Камітэт ААН па ліквідацыі дыскрымінацыі ў дачыненні да жанчын заклікаў Беларусь прыняць меры па абароне Вікторыі Кульшы

КЛДЖ прыняў забеспячальныя меры ў дачыненні да Вікторыі Кульшы без дадатковых патрабаванняў да абгрунтавання, падкрэсліваюць праваабаронцы.

Вікторыя Кульшa

spring96.org

25 жніўня 2025 года Камітэт ААН па ліквідацыі дыскрымінацыі ў дачыненні да жанчын (КЛДЖ) зарэгістраваў скаргу на дыскрымінацыю Вікторыі Кульшы, паведамляе арганізацыя Respect-Protect-Fulfill. ААН заклікала Беларусь тэрмінова прыняць меры па абароне палітзняволенай. Камітэт папрасіў надаць жанчыне неабходную медыцынскую і псіхалагічную дапамогу, а таксама забяспечыць належныя ўмовы ўтрымання.

Раней падобныя меры КЛДЖ прымаў у дачыненні да Паліны Шарэнды-Панасюк і Марыі Калеснікавай, нагадваюць праваабаронцы з Respect-Protect-Fulfill.

«Вясна» нагадае, першапачаткова Вікторыя Кульша была асуджана па артыкуле 342 Крымінальнага кодэкса Беларусі за ўдзел у мірнай акцыі пратэсту і яе арганізацыю. Пасля яе яшчэ чатыры разы асудзілі па артыкуле 411 Крымінальнага кодэкса, нібыта за злоснае непадпарадкаванне патрабаванням адміністрацыі папраўчай установы. Прыцягваць да адказнасці па гэтым артыкуле ў Беларусі могуць неабмежаваную колькасць разоў.

Цяпер Вікторыя ўтрымліваецца ў папраўчай калоніі № 24, а раней – у ПК № 4. Умовы яе знаходжання ў месцах несвабоды бесчалавечныя: яе неаднаразова змяшчалі ў ШІЗА і ПКТ, абмяжоўваюць у перадачах, лістах, званках і сустрэчах з блізкімі. Падчас знаходжання ў ШІЗА і ПКТ Вікторыя ўвесь час знаходзілася ў халодным памяшканні, без пасцельнай бялізны і матраца. Там жанчына не магла нармальна спаць, і зараз з-за холаду ў яе пачаліся праблемы з суставамі.

У знак пратэсту супраць умоў утрымання Вікторыя абвяшчала некалькі галадовак. У красавіку 2025 года стала вядома пра новую галадоўку палітзняволенай – у сувязі з узбуджэннем супраць яе пятай крымінальнай справы. У выніку ў Вікторыі развіліся сур'ёзныя праблемы са здароўем: яна часта губляе прытомнасць, перанесла два сардэчныя прыступы, у яе праблемы з ціскам, тахікардыя, нізкі гемаглабін.

У адрозненне ад папярэдніх падобных спраў, Камітэт прыняў забеспячальныя меры ў дачыненні да Вікторыі Кульшы без дадатковых патрабаванняў да абгрунтавання. Гэта важны крок у развіцці практыкі КЛДЖ па справах супраць беларускіх уладаў, падкрэсліваюць праваабаронцы.

КЛДЖ – гэта міжнародны орган, які сочыць за выкананнем Канвенцыі аб ліквідацыі дыскрымінацыі ў дачыненні да жанчын. Беларусь удзельнічае ў дадзенай Канвенцыі з 1981 года. Зварот у КЛДЖ – адзін з нешматлікіх шляхоў, як беларускі могуць адстойваць свае правы ў міжнародных прававых механізмах.

аз