Пракурор запатрабаваў 4 гады зняволення і 100 базавых адзінак штрафу, паведаміў на старонцы ў Facebook журналіст Сяргей Ваганаў, дзядуля жонкі Ігара Ільяша, палітзняволенай журналісткі Кацярыны Андрэевай.
Ігара Ільяша абвінавачваюць па арт. 3691 (дыскрэдытацыя Рэспублікі Беларусь) і ч. 2 арт. 3614 (садзейнічанне экстрэмісцкай дзейнасці) Крымінальнага кодэкса.
Аб яго затрыманні паведамілі праўладныя рэсурсы 22 кастрычніка 2024 года. З публікацый вынікала, што ён затрыманы за інтэрв'ю незалежным СМІ. Заяўлялася, што тым самым ён займаўся «садзейнічаннем экстрэмісцкім фарміраванням». Таксама сцвярджалася, што журналіст ажыццяўляў «збор дадзеных для замежных разведак – даваў каментары ўкраінскім выданням».
На відэазапісе сілавікоў Ільяш сказаў, што да ліпеня 2021 года зʼяўляўся штатным супрацоўнікам тэлеканала «Белсат», пасля гэтага стаў журналістам-фрылансерам. «На працягу гэтых гадоў я неаднаразова даваў інтэрвʼю розным медыям, у ліку якіх былі і рэсурсы, якія былі прызнаныя на тэрыторыі Беларусі «экстрэмісцкімі фарміраваннямі» ў той ці іншы час», – сказаў ён.
Журналіст асобна згадаў, што сярод замежных СМІ, якія да яго звярталіся па інтэрвʼю, былі ўкраінскія. У прыватнасці, на кантакт выходзіў «украінскі журналіст, які праводзіў расследаванне наконт магчымага ўдзелу беларускіх войскаў ва ўварванні ва Украіну».
Жонка Ільяша Кацярына Андрэева (Бахвалава) была затрымана разам са сваім аператарам Дарʼяй Чульцовай 15 лістапада 2020 года. Яна вяла прамы эфір з месца разгону сілавікамі людзей, якія прыйшлі ўшанаваць памяць забітага актывіста Рамана Бандарэнкі («плошча Перамен» – двор на вул. Чарвякова ў Мінску).
У лютым 2021 года суд Фрунзенскага раёна Мінска прызнаў журналістак вінаватымі ў «арганізацыі дзеянняў, якія груба парушаюць грамадскі парадак« (арт. 342 КК), і прыгаварыў да 2 гадоў пазбаўлення волі.
Беларускія праваабаронцы прызналі іх палітвязнямі.
13 ліпеня 2022 года Гомельскі абласны суд прыгаварыў Андрэеву да 8 гадоў пазбаўлення волі па ч. 1 арт. 356 КК (здрада дзяржаве). Паколькі раней яна ўжо была прыгаворана да зняволення, шляхам частковага складання канчатковым пакараннем ёй прызначылі пазбаўленне волі на тэрмін 8 гадоў і 3 месяцы. Адлік вядзецца з моманту затрымання восенню 2020 года.
20 верасня 2022 года Вярхоўны суд не задаволіў скаргу Андрэевай на рашэнне Гомельскага абласнога суда і пакінуў гэты прысуд у сіле. Разам з тым ВС адкарэктаваў фармулёўку абвінавачання – «выдача дзяржаўных сакрэтаў замежнай арганізацыі, замежнай дзяржаве» заменена на «шпіянаж».
У верасні таго ж года Чульцова выйшла на волю. Цяпер жыве ў Польшчы.
вх