Міністр замежных спраў Беларусі Максім Рыжанкоў заявіў, што закрыццё Польшчай мяжы з Беларуссю – гэта «небяспечная міна, закладзеная пад адносіны з іншымі краінамі», паведаміла прапагандысцкае агенцтва БелТА. Паводле слоў міністра, Радаслаў Сікорскі павінен будзе растлумачыць гэта прадстаўніку кітайскай дыпламатыі падчас сустрэчы ў панядзелак.
Ад поўначы з чацвярга на пятніцу мяжа з Беларуссю была зачынена да далейшага паведамлення. Рашэнне ўрада звязана з агрэсіўнымі расійска-беларускімі вучэннямі «Захад 2025», паведаміла Міністэрства ўнутраных спраў і адміністрацыі.
У нядзелю Максім Рыжанкоў, адзін з найважнейшых палітыкаў у цяперашнім урадзе Беларусі, выказаўся па гэтым пытанні ў эфіры тэлеканала «Беларусь 1».
«Калі Польшча прыняла рашэнне, яна падарвала свае ўласныя інтарэсы і, больш за тое, заклала небяспечнае міннае поле ў адносінах з іншымі краінамі», – сказаў ён.
Ён таксама згадаў пра візіт міністра замежных спраў Кітая ў Польшчу ў панядзелак. Паводле слоў беларускага палітыка, Ван І запатрабуе ад Радаслава Сікорскага тлумачэнняў, чаму польскі ўрад перашкаджае адкрытаму гандлю Пекіна.
«Няхай яны растлумачаць Кітаю, чаму кітайскія тавары будуць заставацца на мяжы больш за тыдзень пад цалкам сфабрыкаванай падставай і не даходзяць да сваіх пакупнікоў, тым самым парушаючы некаторыя тэрміны пастаўкі», – сказаў Рыжанкоў.
Беларускі дыпламат, як падкрэслівае прапагандысцкае агенцтва БЕЛТА, перакананы, што Польшча адкрые сваю мяжу з Беларуссю пасля вучэнняў «Захад-2025».
«У іх няма іншага выбару», – сцвярджаў ён.
Чакаецца, што вышэйзгаданая сустрэча Радаслава Сікорскага і Ван І будзе ў першую чаргу сканцэнтравана на геапалітычных пытаннях. Паводле PAP, Сікорскі і Ван І абмяркуюць шэраг палітычных пытанняў, па якіх Польшча і Кітай адрозніваюцца, – у першую чаргу іх стаўленне да расійскай агрэсіі ва Украіне.
Чакаецца, што польскі бок падыме пытанне кітайска-расійскіх адносін і падтрымкі Масквы Пекінам. Паводле ацэнак, прыкладна 80% тавараў двайнога прызначэння, якія могуць выкарыстоўвацца Расіяй, паходзяць з Кітая або праходзяць праз Кітай. Акрамя таго, Пекін ускосна падтрымлівае Крамль, купляючы расійскую нафту.
Міністэрства замежных спраў абвясціла, што па просьбе кітайскага боку пасля сустрэчы не будзе сумесных заяваў.
Polsat News/ав