Міністэрства абароны Беларусі 24 верасня акрэдытавала новага вайсковага аташэ пры пасольстве Вялікабрытаніі і Паўночнай Ірландыі – маёра Уільяма Джорджа. Ён цяпер афіцыйна прадстаўляе Вялікабрытанію ў беларускім вайсковым ведамстве, паведаміла «Наша Ніва» са спасылкай на прэс-службу Міністэрства абароны.
У Дэпартаменце міжнароднага вайсковага супрацоўніцтва Мінабароны адбылася сустрэча з Уільямам Джорджам, на якой абмеркавалі пытанні двухбаковых кантактаў у сучасных умовах.
Вайсковага аташэ Вялікабрытаніі не было ў Беларусі ўжо амаль 5 гадоў. У лістападзе 2020 года тагачасны вайсковы аташэ Уайт Байкот Цімаці разам з намесніцай пасла Лізай Тумвуд былі абʼяўленыя персонамі нон грата з-за «пацверджанага дэструктыўнага характару дзейнасці гэтых асоб».
У жніўні мінулага года завяршылася місія пасла Вялікабрытаніі ў Беларусі Жаклін Перкінс, і з таго часу дыпмісія кіруецца часовым павераным.
аз