Змены супрацоўнікаў у пунктах пропуску на мяжы з Польшчай «укамплектаваныя і ўзмоцненыя», паведамляе Дзяржаўны мытны камітэт (ДМК). Як адзначае ведамства, рашэнне прынятае «для афармлення максімальна магчымай колькасці чыгуначнага транспарту, грузавікоў, легкавых аўто і аўтобусаў, якія ідуць праз беларуска-польскую мяжу».
«Мытнае афармленне транспартных сродкаў у аўтадарожных пунктах пропуску беларускі бок пачне загадзя з 23:00 [24 верасня] з мэтай іх аператыўнага ўбыцця пасля афіцыйнага адкрыцця польскім бокам руху», – гаворыцца ў паведамленні.
Чыгуначныя саставы для перасячэння мяжы «будуць афармляцца ў мытных адносінах таксама загадзя, па меры падачы іх Беларускай чыгункай», паведамляе ДМК.
Як нагадвае «Позірк», 23 верасня прэм’ер-міністр Польшчы Дональд Туск паведаміў, што мяжа з Беларуссю будзе адкрытая апоўначы 25 верасня (1:00 па беларускім часе), аднак падкрэсліў, што ў выпадку неабходнасці – калі «ўзмоцніцца напружанасць або агрэсіўныя паводзіны некаторых суседзяў» – урад «не будзе вагацца» і закрые мяжу зноў.
Польшча закрыла мяжу з Беларуссю з 12 верасня, калі пачаліся беларуска-расійскія стратэгічныя вучэнні «Захад-2025», якія і паслужылі падставай для такога рашэння.
Дэмакратычны лідар Беларусі Святлана Ціханоўская вітала намер Польшчы адкрыць мяжу з Беларуссю, адзначыўшы «канструктыўную ролю» Кітая.
аз