Супрацоўнікі Падляскага падраздзялення Памежнай варты перахапілі пакеты з нелегальнымі цыгарэтамі. Іх перакінулі з Беларусі з дапамогай метэазонда.
Агулам у шаснаццаці выпадках, дзякуючы супрацоўніцтву функцыянераў Памежнай службы з мытнікамі і паліцыяй, былі выяўлены нелегальныя тытунёвыя вырабы на суму больш за 330 000 злотых (78,5 тысяч еўра).
Кантрабанду і кантрабандыстаў затрымлівалі ў некалькіх месцах.
Сярод іншага, супрацоўнікі памежнага паста ў Кузніцы затрымалі легкавы аўтамабіль, якім перавозілася кантрабанда.
«Двое грамадзян Польшчы перавозілі ў багажніку аўтамабіля пакеты з нелегальнымі цыгарэтамі з акцызнымі маркамі Беларусі. Цыгарэты былі перавезены ў Польшчу з дапамогай метэазонда», паведаміла прэс-служба Падляскага падраздзялення Памежнай варты.
У гміне Сухаволя ў полі быў знойдзены пакет з 1500 пачкамі нелегальных цыгарэт і рэшткі метэазонда.
Аналагічным чынам, у зоне дзеяння памежнага паста ў Крынках было выяўлена 1500 пачкаў цыгарэт без польскіх акцызных марак агульным коштам больш за 26 000 злотых (6 200 еўра).
Супрацоўнікі памежнай службы з Аўгустова таксама правялі аперацыі па затрыманні асоб, якія кантрабандай займаліся з выкарыстаннем метэаралагічных шароў.
«Былі затрыманыя на гарачым двое грамадзян Польшчы і адзін грамадзянін Літвы, якія прыйшлі забраць забаронены тавар», — паведаміла Памежная служба.
Затрыманым асобам будзе прад'яўлена абвінавачванне ў адпаведнасці з Падатковым крымінальным кодэксам, — паведаміла прэс-служба Падляскага падраздзялення Памежнай варты.
яс