У сераду ў Літве з візітам знаходзіцца спецыяльны пасланнік ЗША па Беларусі Джон Коўл. Падчас яго сустрэчы з кіраўнічкай літоўскага ўрадa Інгай Ругінене абмяркоўвалася, між іншым, пытанне Беларусі, паведамляе lrt.lt.
Прэм'ерка падзякавала ЗША за актыўныя намаганні па вызваленні палітычных зняволеных у Беларусі.
«Пазіцыя Літвы застаецца адназначнай – беларускі рэжым павінен спыніць рэпрэсіі, у краіне не павінна застацца ніводнага палітычнага зняволенага», – адзначаецца ў афіцыйным паведамленні.
На сустрэчы таксама абмяркоўвалася сітуацыя з бяспекай у рэгіёне.
«Беларускі рэжым застаецца адной з асноўных пагроз бяспецы рэгіёну, у тым ліку і Літвы. Пра гэта сведчаць варожыя гібрыдныя дзеянні Беларусі супраць суседніх краін – паветраныя шары з кантрабандай, незаконная міграцыя і затрыманне грузавікоў, а таксама падтрымка расейскай ваеннай агрэсіі супраць Украіны», – заявіла кіраўнічка літоўскага ўрада.
Інга Ругінене таксама падкрэсліла, што Літва высока цэніць стратэгічнае партнёрства з ЗША і трывалыя хаўрусніцкія адносіны паміж краінамі.
Раней Літва звярталася да ЗША з просьбай аб дапамозе ў вырашэнні праблемы паветраных шароў з кантрабандай, якія запускаюцца з Беларусі, а таксама пытання затрыманых рэжымам у Мінску грузавікоў літоўскіх кампаній.
Як паведамлялася раней, з Літвы спецыяльны пасланнік ЗША Джон Коўл павінен адправіцца ў Беларусь.
У сярэдзіне снежня мінулага года Джон Коўл абʼявіў аб зняцці санкцый з экспарту беларускіх калійных угнаенняў.
Раней амерыканскі палітык заяўляў, што «па меры нармалізацыі адносін паміж дзвюма краінамі ўсё больш санкцый будзе здымацца».
аз