У Беларусі ўлады абнавілі спісы прафесіяў, якія даюць права на датэрміновую пенсію за працу ў шкодных умовах, і выдалілі больш за 800 найменняў. Адпаведную пастанову падпісаў прэм’ер-міністр 8 красавіка, яна заменіць дакумент 2005 года і ўступіць у сілу з 1 ліпеня, — паведамляе «Белсат».
Паводле Мінпрацы, частку прафесіяў выключылі як неактуальныя, іншыя — праз тое, што шкодныя ўмовы нібыта не пацвердзіліся. Некаторыя віды работ перанеслі з катэгорыі «асабліва шкодных» у менш небяспечныя.
Эксперты лічаць, што галоўная прычына — эканамічная. З-за старэння насельніцтва і міграцыі нагрузка на пенсійны фонд расце, і дзяржава спрабуе скараціць выдаткі.
Пры гэтым крытыкі адзначаюць, што ацэнка ўмоваў працы выклікае сумневы, а работнікі страчваюць сацыяльныя гарантыі. У незалежных прафсаюзаў няма магчымасці ўплываць на рашэнні.
На думку эканамістаў, гэта можа стаць першым крокам да далейшага павышэння пенсійнага веку ў краіне.
эж