У Беларусі з’явіліся новыя звесткі пра затрыманага каталіцкага святара Анатоля Парахневіча. Паводле інфармацыі вернікаў, 65-гадовы ксёндз, які ўжо больш за месяц утрымліваецца пад вартай, перанёс інфаркт і знаходзіцца ў цяжкім стане.
Святар служыў пробашчам у Вілейскім раёне. Як паведамляе katolik-life, духоўнага, імаверна, утрымліваюць у следчым ізалятары КДБ. Падрабязнасці абвінавачвання не раскрываюцца, аднак вядома, што ксяндзу інкрымінуюць «здраду дзяржаве».
Затрыманне ксяндза праводзілі невядомыя ў масках, якія прыехалі на некалькіх аўтамабілях. Дом святара пасля гэтага быў апячатаны.
Вернікі выказваюць сумневы ў абгрунтаванасці абвінавачвання і мяркуюць, што святар мог стаць ахвярай пераследу.
Раней па аналагічным артыкуле быў асуджаны ксёндз Генрых Акалатовіч, якога пазней вызвалілі пры пасярэдніцтве Ватыкана.
эж