Беларускія сілавікі працягваюць маштабны пераслед, звязаны з Еўрапейскім гуманітарным універсітэтам. Паводле Праваабарончага цэнтра «Вясна», з пачатку чэрвеня па ўсёй краіне праведзена ўжо больш за 60 ператрусаў у межах так званай «справы ЕГУ».
Праваабаронцы паведамляюць, што крымінальную справу распачалі з-за аплаты навучання ва ўніверсітэце, пачынаючы з 2016 года. Ператрусы адбываюцца ў былых і цяперашніх студэнтаў, выпускнікоў ЕГУ, а таксама ў іх сваякоў. Да некаторых людзей сілавікі прыходзяць на працу або выклікаюць іх на «размовы».
Паводле «Вясны», пад ціск трапляюць не толькі студэнты і выпускнікі ЕГУ, але і іх бацькі. Сілавікі патрабуюць ад маладых людзей, якія цяпер вучацца ў Літве, цягам 10 дзён адлічыцца з універсітэта і вярнуцца ў Беларусь, пагражаючы ў адваротным выпадку крымінальным пераследам іх сваякоў.
эж