Кіеў хоча далучыцца да высвятлення абставінаў інцыдэнту з беларускімі дзецьмі ў Бранскай вобласці

Упаўнаважаны Вярхоўнай Рады Украіны Дзьмітро Лубінец заявіў, што яго краіна не мае дачынення да гэтай падзеі.

Кіеў хоча далучыцца да высвятлення абставінаў інцыдэнту з беларускімі дзецьмі ў Бранскай вобласці

news.by

Хлопчыка, які атрымаў цяжкія раненні ў выніку атакі ў Бранскай вобласці, прааперавалі і цяпер транспартуюць на апаратнай падтрымцы ў Мінск, паведамляе «Свабода». Паводле дзяржвыдання news.by, параненых дзяцей транспартуюць у медычныя ўстановы Мінска.

— Усе іншыя пацярпелыя ў прытомнасці, размаўляюць і адчуваюць сябе лепш. Нягледзячы на аскепкавыя раненні, прагнозы станоўчыя, — адзначыла выданне.

Між тым, Украіна заявіла, што гатовая далучыцца да празрыстага высвятлення абставінаў інцыдэнту.
Упаўнаважаны Вярхоўнай Рады Украіны Дзьмітро Лубінец заявіў, што яго краіна не мае дачынення да атакі аўтобуса з беларускімі дзецьмі.

— У сувязі з пашырэннем інфармацыі пра атаку на аўтобус з дзецьмі ў Бранскай вобласці тэрмінова звязаўся з беларускім бокам і атрымаў першасную інфармацыю аб гэтым інцыдэнце. Падчас размовы асобна падкрэсліў: Украіна не мае ніякага дачынення да гэтай падзеі, — паведаміў Дзьмітро Лубінец у сваім Telegram-канале.

Паводле яго, сілы абароны Украінs не наносяць удараў па цывільных аб’ектах і цывільным насельніцтве.

— На тэрыторыі Расійскай Федэрацыі ўкраінскія вайскоўцы цэляцца выключна ў вайсковыя цэлі. У адрозненне ад Расіі, якая штодня атакуе ўкраінскія гарады, жылыя дамы і забівае мірных грамадзян, Украіна дзейнічае ў межах нормаў міжнароднага гуманітарнага права. Не выключаю, што мова ідзе пра чарговую правакацыю або інфармацыйную аперацыю, выгадную найперш Расійскай Федэрацыі, — заявіў украінскі амбудсмен.

аз