Польшча яшчэ на 60 дзён працягнула абмежаванне права падаваць заявы на міжнародную абарону на мяжы з Беларуссю. Адпаведная пастанова ўступіла ў сілу ў аўторак. Гэта ўжо дзясятае падаўжэнне абмежавання, якое дзейнічае з сакавіка 2025 года.
За працяг абмежавання Сейм прагаласаваў 6 лістапада. Урад абгрунтаваў сваё рашэнне тым, што Беларусь па-ранейшаму выкарыстоўвае міграцыю як інструмент ціску на Польшчу. Паводле польскіх уладаў, беларускія службы ўдзельнічаюць у нападах на польскіх памежнікаў і вайскоўцаў, а таксама дапамагаюць арганізоўваць незаконнае перасячэнне мяжы.
З моманту ўвядзення абмежавання і да 15 кастрычніка гэтага года польскія памежнікі не прынялі заявы ад 496 замежнікаў. Пры гэтым магчымасць звярнуцца па міжнародную абарону захоўваецца для непаўналетніх без суправаджэння, цяжарных жанчын, людзей, якія маюць патрэбу ў асаблівым стаўленні, а таксама тых, каму пагражае рэальная небяспека ў краіне, адкуль яны прыбылі.
Супраць абмежавання выступаюць праваабарончыя арганізацыі. На іх думку, яно парушае Канстытуцыю Польшчы і міжнародныя абавязацельствы краіны, у тым ліку Жэнеўскую канвенцыю аб статусе ўцекачоў.
PAP/нг