Беларуская Служба
Дадай у Google

Дадайце нас у абраныя крыніцы ў Google, каб нашы навіны заўсёды былі сярод першых вынікаў вашага пошуку

МАП запатрабавала вызваліць Вацлава Арэшку і яшчэ 20 беларускіх прафсаюзных актывістаў

18.11.2026 15:30
Падчас чарговага паседжання Адміністрацыйнай рады МАП ў Жэневе разглядалі і беларускае пытанне.
-
Штаб-кватэра МАП у ЖэневеАвторство: Jérémy Toma. Собственная работа, CC BY-SA 4.0, https://commons.wikimedia.org/wiki/Special:Redirect/page/118460965

Адміністрацыйная рада Міжнароднай арганізацыі працы (МАП) заклікала ўрад Беларусі вызваліць усіх прафсаюзных актывістаў, якія знаходзяцца ў няволі за сваю дзейнасць і асобным пунктам падтрымала Вацлава Арэшку, які ў зняволенні страціў зрок, паведамляе «Свабода».

Ад 9 лістапада ў Жэневе праходзіць чарговае пасяджэнне Адміністрацыйнай рады МАП, на якім 17 лістапада разглядалі беларускае пытанне.

МАП з 2023 года паставіў Беларусь на асаблівы кантроль за парушэнні артыкула 33 Статута гэтай арганізацыі, прызнаўшы, што ўрад Беларусі парушае правы беларускіх працаўнікоў на прафесійныя аб’яднанні і чыніць іншыя перашкоды працоўнаму руху.

Арганізацыя, якая аб’ядноўвае прадстаўнікоў 192 краін свету, патрабуе ад Беларусі, якая ўваходзіць у МАП, выканання гэтага артыкула, аднаўлення Беларускага кангрэса дэмакратычных прафсаюзаў і вызвалення ўсіх беларускіх прафсаюзных актывістаў.

— За кратамі яшчэ застаюцца 20 беларускіх прафсаюзных актывістаў. Яны ніякія не крымінальнікі, як кажуць прадстаўнікі ўраду. Мы патрабуем іх абавязковага вызвалення і вітаем тое, што МАП нас у гэтым падтрымлівае, — сказаў «Свабодзе» былы палітвязень, лідар Беларускага кангрэс дэмакратычных прафсаюзаў, сябар Адміністрацыйнай рады МАП Аляксандр Ярашук, які ўдзельнічаў у працы Рады.

У выніку абмеркавання беларускага пытання была прынятая рэзалюцыя з 12 пунктаў. Адміністрацыйная рада МАП заклікала ўрад Беларусі «перагледзець сваю пазіцыю і вызваліць усіх прафсаюзных актывістаў, якія знаходзяцца ў зняволенні за сваю прафсаюзную дзейнасць».

Сярод іншых патрабаванняў да ўладаў Беларусі — супрацоўнічаць са спецпасланнікам для Беларусі, які быў прызначаны раней, але дагэтуль не прызнаны беларускім урадам.

аз