Прэм'ер Матэвуш Маравецкі падкрэсліў, што палітыкі кіроўнай партыі „Права і справядлівасць” бяруць пад увагу пазіцыю грамадзянаў.
Кіраўнік польскага ўраду на прэс-канферэнцыі, якая адбылася ля Нацыянальнага стадыёну ў Варшаве, урачыста адкрыў турнэ палітыкаў кіроўнай партыі па краіне. Сёння сам прэм’ер наведае некалькі гарадоў і вёсак у Мазовіі.
Матэвуш Маравецкі заявіў, што падчас перадвыбарчага аб'езду краіны ён падсумуе рэформы, уведзеныя ПіС, у тым ліку сацыяльныя праграмы.
„Мы ажыццявілі некалькі законаў, а некаторыя праекты ўжо рэалізавалі. Напрыклад, выплаты сродкаў у рамках праграмы „Пэнсія +” адбыліся ўжо ў траўні. З кастрычніка падаходны падатак для ўсіх грамадзянаў будзе паніжаны з 18% да 17%. Мы вызвалілі маладых працаўнікоў ад абавязку выплаты падаходнага падатку. Вяртаем мабільнасць у малых гарадках і вёсках, шляхам аднаўлення аўтобусных маршрутаў. Нельга забываць таксама пра 500 злотых дапамогі на кожнае дзіця ў сям’і”, - нагадаў прэм’ер Маравецкі.
Нагадаем, выбары ў парламент у Польшчы адбудуцца 13 кастрычніка.
аз