Федэральная служба выкання пакаранняў паведаміла, што Аляксей Навальны, лідар антыкрамлёўскай апазіцыі, які лічыўся найважнейшым апанентам прэзідэнта Расіі Уладзімера Пуціна, памёр у калоніі за Палярным колам.
Войцех Кананьчук заявіў, што трэба казаць не пра смерць, а дэ-факта пра забойства. «Аляксей Навальны быў забіты ў калоніі за Палярным кругам, куды быў накіраваны ў канцы мінулага года», – падкрэсліў ён.
«Навальнага працяглы час утрымлівалі ў цяжкіх умовах у адзіночнай камеры, яму не дапускалі дактароў, не кажучы ўжо пра абмежаваныя кантакты з адвакатам і, тым больш, з сям'ёй. Для яго былі створаны ўмовы, у якіх, па сутнасьці, Навальны павольна паміраў», – сказаў ён.
Дырэктар OSW заявіў, што гэта сведчыць пра тое, што «такі быў план Крамля» ад пачатку, бо інакш смерць апазіцыянера не дапусцілі б. «Тое, што Навальны памёр, – прамы вынік рашэння Крамля, якое паслядоўна выконвалася на працягу доўгага часу», – дадаў ён. Ён падкрэсліў, што не варта верыць афіцыйнай заяве на гэты конт, у якой, верагодна, будзе ісці гаворка пра «хранічныя захворванні або іншыя нібыта натуральныя прычыны смерці».
Адказваючы на пытанне аб магчымых міжнародных наступствах, Кананчук выказаў надзею, што забойства пакажа Захаду, дзе некаторыя яшчэ не зразумелі прыроды крамлёўскага рэжыму, з кім ён мае справу. Ён дадаў, што гэта павінна стаць штуршком для ўвядзення далейшых санкцый супраць Расіі.
«Не можа быць ніякай сітуацыі, калі рэжым, які ўжо ёсць квазітаталітарным рэжымам, спачатку выносіць прысуд у абсалютна абсурдным судзе, а потым дэ-факта забівае галоўнага апазіцыянера. Няма сумненняў у тым, што гэта быў цалкам фальшывы суд. Аляксей Навальны быў забіты ў турме як невінаваты чалавек. Я спадзяюся, што гэта разбурыць ілюзіі, якія засталіся наконт таго, што такое пуцінскі рэжым сёння», – сказаў ён.
Аляксей Навальны – найважнейшая фігура ў расейскай апазіцыі і вораг нумар адзін Уладзіміра Пуціна. Яму было 47 гадоў. 14 лютага прэс-сакратарка Навальнага Кіра Ярмыш паведаміла, што палітвязень у 27-ы раз змешчаны ў карцар.
У студзені споўнілася тры гады з моманту арышту і зняволення Навальнага пасля вяртання ў Расею з Германіі, дзе ён праходзіў лячэнне пасля спробы атручвання, якую, хутчэй за ўсё, здзейснілі расійскія спецслужбы. Улады распачалі супраць яго далейшыя крымінальныя справы, у выніку якіх прысудзілі да больш чым 30 гадоў пазбаўлення волі.
25 снежня 2023 года паплечнікі Навальнага паведамілі, што апазіцыянера перавялі ў папраўчую калонію № 3 у горадзе Чарп Ямала-Ненецкай аўтаномнай акругі на поўначы Расіі. Раней Навальны знаходзіўся ў папраўчай калоніі ва Уладзімірскай вобласці, прыкладна ў 250 км на ўсход ад Масквы.
На думку праваабаронцаў, перавод апазіцыянера на новае месца варта разглядаць як форму ціску хаця б з-за складаных кліматычных умоў на Крайняй Поўначы Расіі.
PAP/вх