Колькасць загінулых у выніку тэракту ў «Крокус Сіці Хол» узрасла да 82 чалавек, з іх трое дзяцей. Колькасць пацярпелых павялічылася да 183 чалавек, з іх восем дзяцей, піша тэлеграм-канал «112».
Раней у арганізацыі тэракту прызналася «Ісламская дзяржава».
Паводзіны тэрарыстаў фактычна адпавядаюць дзеянням так званай «Ісламскай дзяржавы», – мяркуе Анджэй Мрочэк (Andrzej Mroczaek) з Цэнтра даследавання тэрарызму Collegium Civitas. У эфіры TVP INFO польскі эксперт заявіў, што тэрарысты дзейнічалі таксама, як падчас ранейшых атак «Ісламскай дзяржавы».
- Спосаб дзеяння тэрарыстаў падчас замаху сапраўды адпавядае таму, як дзейнічае «Ісламская дзяржава». Гэта іх характэрны стыль, калі параўнаць яго з ранейшымі тэрактамі. Яны выглядаюць падобным чынам – падрыхтоўка, збор сродкаў, прыезд, атака і хуткае адступленне. А цяпер яны схаваліся – гэта апошняя фаза.
Тэрарысты спачатку падпалілі адну з канцэртных залаў, а потым пачалі страляць з аўтаматаў па ўсіх, хто знаходзіўся паблізу. Тым часам агонь перакінуўся на верхнія паверхі і дах.
У Бранскай вобласці, у 16 км ад мяжы Беларусі затрымалі машыну з падазраванымі тэрарыстамі. У ёй знаходзіліся падазраваныя – трое грамадзян Таджыкістана і адзін расіянін. Паведамляецца, што дваіх удалося затрымаць, а астатнія паспелі ўцячы. Такую інфармацыю распаўсюджваюць расійскія тэлеграм-каналы, а таксама беларускія «сілавікі».
Аднак МЗС Таджыкістана ўжо назвала фэйкам інфармацыю аб датычнасці грамадзян рэспублікі да тэракта ў Падмаскоўі.
Некалькі тыдняў таму амерыканскія спецслужбы папярэджвалі аб магчымасці буйнога тэракту ў Расіі. Пуцін назваў гэта шантажом.
IAR/BAZA/ASTRA/«Осторожно, новости»/112
нг