Польскія памежнікі ўшанавалі памяць жаўнера, які памёр у шпіталі ў выніку раненняў атрыманых падчас службы на польска-беларускай мяжы.
Вайсковец 1-й Варшаўскай бранятанкавай брыгады памёр у сталічным шпіталі больш чым праз тыдзень пасля таго, як яго параніў нажом адзін з мігрантаў, якія спрабавалі нелегальна перасекчы мяжу каля вёскі Дубічы Царкоўныя на Падляшшы.
«З вялікім смуткам мы ўспрынялі паведамленне аб гібелі жаўнера, нашага калегі, які служыў ахоўваючы дзяржаўную мяжу. Выказваем глыбокія спачуванні яго родным і блізкім. Абʼядноўваемся ў болі з жаўнерамі Войска Польскага», – напісалі памежнікі ў сваім профілі ў сацыяльных сетках.
Памяць трагічна памерлага жаўнера ўшанавалі таксама прэм’ер Дональд Туск і міністр абароны Уладзіслаў Касіняк-Камыш.
«Малады жаўнер Матэвуш аддаў сваё жыццё, абараняючы мяжу Рэспублікі Польшча. Радзіма і суайчыннікі не забудуць гэтую ахвяру. Выказваю глыбокія спачуванні яго блізкім», – напісаў Дональд Туск у сацыяльных сетках.
«З глыбокім жалем развітваюся з нашым жаўнерам Матэвушам, які, нягледзячы на намаганні ўрачоў, памёр пасля бандыцкага нападу пры абароне польскай мяжы. Яго ахвярнасць і адданасць Радзіме зʼяўляюцца прыкладам найвышэйшай мужнасці», – напісаў у сацсетках Уладзіслаў Касіняк-Камыш.
IAR/аз