З сённяшняга дня пачынаюцца выплаты фінансавай падтрымкі людзям, якія на мінулым тыдні пацярпелі ад буйнога пажару ў шматкватэрным даме ў Зомбках(Ząbki) ля Варшавы.
Мэр горада Малгажата Зыськ (Małgorzata Zyśk) распавяла Польскаму радыё пра памер дапамогі:
- Першыя выплаты сёння будуць пералічаныя на рахункі пацярпелых у пажары жыхароў. Гаворка ідзе пра дапамогу ў памеры 8 тысяч злотых (больш за 1 882 еўра), якія былі перададзеныя ўрадам пры пасярэдніцтве Мазавецкага ваяводы.
Службы надалей працуюць на месцы, дзе ў чацвер адбыўся буйны пажар. Паліцыя пастаянна пільнуе будынку. Функцыянеры прапускаюць у кватэры выключна жыхароў трох першых паверхаў. Да верхніх паверхаў дагэтуль дабрацца немагчыма.
У чацвер вечарам у Зомбках пад Варшавай на вуліцы Паўстанцаў успыхнуў пажар. Агонь распаўсюдзіўся на гарышчы трох злучаных паміж сабой жылых будынкаў. Кватэры на чацвёртым і пятым паверхах амаль цалкам згарэлі. У сваю чаргу кватэры на ніжэйшых паверхах, былі затопленыя падчас тушэння пажару. У выніку былі эвакуяваныя каля 500 чалавек.
IAR/аз