Новыя амерыканскія мыты найбольш удараць па польскіх прадпрыемствах аўтамабільнай, перапрацоўчай, мэблевай і электроннай прамысловасці. Пра гэта гаворыцца ў дакладзе аналітыкаў банка Pekao S.A.
Адзін з аўтараў дакладу, эканаміст Себасцьян Рой, заявіў, што найбольшыя страты панясе металаапрацоўчы сектар. Паводле яго, прыбыткі гэтай галіны вытворчасці могуць скараціцца больш як на 1,5%:
— Не трэба здзіўляцца, бо як сталь, так і алюміній і медзь, што экспартуюцца з Еўропы ў Злучаныя Штаты, будуць абкладацца стаўкай 50%, а не, як у выпадку іншых тавараў 15%. Праблемы будуць і ў мэблевай прамысловасці, страты якой ацэньваюцца ў 0,9%, звязаныя яны з ускосным эфектам — перадусім са скарачэннем еўрапейскіх замоў, звязаных з цяжкасцямі экспарту ў ЗША.
Эканаміст дадае, што ў доўгатэрміновай перспектыве канкурэнцыя амерыканскіх і кітайскіх вытворцаў можа адкрыць магчымасці для еўрапейскіх кампаній.
У чацвер, 7 жніўня, уступілі ў сілу новыя амерыканскія мыты на тавары з каля 70 краін свету, у тым ліку з краін Еўрапейскага Саюза, для большасці з іх мыта складае 15%.
IAR/эж