Дональд Туск заявіў, што вельмі агрэсіўныя расійска-беларускія вучэнні «Захад» пачнуцца ў пятніцу «вельмі блізка да польскай мяжы». «Гэта мае наступствы. У чацвер апоўначы з меркаванняў нацыянальнай бяспекі мы закрыем усе памежныя пераходы з Беларуссю, у тым ліку чыгуначныя», — абвясціў прэм'ер-міністр.
Прэм'ер-міністр падкрэсліў, што ваенныя вучэнні, арганізаваныя Масквой і Мінскам, накіраваны на адчувальную зону бяспекі НАТА. «Гэтыя тыпы вучэнняў маюць мэту: Сувалкскі калідор. Пакуль што гаворка ідзе пра сімуляцыі», — падкрэсліў Туск.
Прэм'ер-міністр абвясціў, што Польшча адкажа на гэтыя манеўры ўласнымі вучэннямі з удзелам саюзнікаў. Туск таксама папярэдзіў аб павелічэнні колькасці правакацый. У гэтым кантэксце ён нагадаў пра затрыманне польскага манаха беларускімі службамі. Прэм'ер-міністр абвясціў, што міністэрствы, якія закрануты гэтым рашэннем, прадставяць справаздачы аб наступствах закрыцця мяжы.
Вучэнні «Захад-2025»
Расія і Беларусь правядуць вучэнні «Захад-2025» з 12 па 16 верасня — першыя маштабныя вучэнні пасля ўварвання ва Украіну ў лютым 2022 года. Яны будуць ахопліваць тэрыторыю каля межаў з Польшчай і Літвой, абедзвюма краінамі НАТА. Такім чынам, вучэнні можна разглядаць як падрыхтоўку рэжыму Пуціна (і Лукашэнкі) да магчымага сутыкнення з сіламі НАТА.
Папярэднія ацэнкі замежных экспертаў паказвалі, што для вучэнняў у Беларусі можа быць мабілізавана да 150 000 вайскоўцаў. Літоўская разведка ў цяперашні час ацэньвае, што ў вучэннях прымуць удзел максімум 30 000 вайскоўцаў.
Паводле PAP/вх