Цяперашняя мадэль эканамічнага росту Польшчы вычэрпваецца, і тэмпы выроўнівання з найбагацейшымі эканомікамі Еўропы відавочна запавольваюцца, сцвярджаюць аналітыкі Варшаўскага інстытуту прадпрымальніцтва.
Эксперты інстытуту адзначылі, што пасля трох дзесяцігоддзяў паскоранага развіцця Польшча дасягнула кропкі, якая яшчэ нядаўна здавалася далёкай марай. Аднак у сваёй апошняй справаздачы «Пачатковы баланс» яны ацанілі, што «цяперашняя мадэль росту вычэрпваецца».
На іх думку, зніжэнне прыватных інвестыцый – з 23-24% ВУП да 17% – стала галоўным абмежавальнікам росту. «Карпаратыўныя інвестыцыі выглядаюць яшчэ горш: узровень карпаратыўных інвестыцый знізіўся з 12% ВУП (2000–2004) да ўсяго 9,3% ВУП у 2020–2024 гадах. Тым часам у Чэхіі ён застаецца на ўзроўні 15–18% ВУП, у Славакіі – вышэй за 12% ВУП, а ў Германіі – на стабільным узроўні каля 11–12% ВУП», – адзначылі яны.
Аналітыкі дадалі, што інавацыі і нематэрыяльны капітал застаюцца «самым слабым звяном у польскай мадэлі развіцця». Яны таксама папярэджваюць, што дзяржаўныя фінансы «набліжаюцца да межаў бяспечнай гнуткасці». Суадносіны агульнага дзяржаўнага доўгу да ВУП павялічыліся з прыблізна 36% ВУП у 2000 годзе да прыблізна 55% ВУП у 2024 годзе, а выдаткі на абслугоўванне доўгу ў 2024 годзе былі ўдвая вышэйшымі за выдаткі дзяржаўнага бюджэту на вышэйшую адукацыю і навуку, паведамляюць аналітыкі.
Інстытут рэкамендуе павялічыць узровень карпаратыўных інвестыцый і змяніць структуру выдаткаў з кароткатэрміновых інвестыцый на праекты, якія павышаюць прадукцыйнасць (аўтаматызацыя, пераўтварэнне энергіі, лічбавізацыя). «Для гэтага патрабуецца стабільнае, прадказальнае рэгулятарнае асяроддзе і абмежаванне заканадаўчай перавытворчасці», – падкрэслілі яны.
PAP/юл