Кракаўская паліцыя правярае, ці парушыў міністр юстыцыі Польшчы Вальдэмар Журэк правілы дарожнага руху. Гаворка ідзе пра відэа з падкаста, на якім бачна, як міністр, даючы інтэрв’ю за рулём легендарнага польскага малалітражнага аўтамабіля Fiat 126p, не саступае дарогу мінаку на пешаходным пераходзе.
Як паведаміла прадстаўніца паліцыі Кракава Анна Воляк-Грамала:
«Калі пацвердзіцца, што міністр не прапусціў пешахода на пешаходным пераходзе, то за гэта пагражае штраф у памеры 1500 злотых (360 еўра) і 15 штрафных пунктаў».
Праверку распачалі на наступны дзень пасля публікацыі відэазапісу ў інтэрнэце. Паліцыя павінна ўсталяваць дату відэа і сабраць доказы, у тым ліку запісы з гарадскіх камер. Сам міністр напісаў у сетцы X, што не ўхіляецца ад адказнасці і што канчатковую ацэнку сітуацыі павінны даць праваахоўныя органы.
iar/эж