Зялёная трансфармацыя, энергетычная бяспека і новая рэіндустрыялізацыя краіны — гэта ключавыя тэмы, якія будуць абмяркоўвацца падчас Польскага кліматычнага кангрэса, які пачынаецца 25 сакавіка ў польскай сталіцы. Мерапрыемства будзе доўжыцца тры дні (25-27 сакавіка), і акрамя прадстаўнікоў прамысловасці ў ім прымуць удзел і прадстаўнікі ўрада, у тым ліку міністр энергетыкі Мілаш Мотыка і намеснік міністра клімату і навакольнага асяроддзя Уршуля Зеліньска.
Падчас трохдзённага кангрэса аналітыкі абмяркуюць такія тэмы, як будучыня энергетычнага рынку і новыя мадэлі фінансавання аднаўляльных крыніц энергіі, атамнай энергетыкі і малых ядзерных рэактараў, а таксама крытычна важнай інфраструктуры, і рэальныя выдаткі на адаптацыю да змены клімату.
Як падкрэсліваюць арганізатары кангрэса, рынак выразна паказвае, што трансфармацыя ўступае ў фазу складаных інвестыцыйных рашэнняў, у якіх удзельнічаюць найбуйнейшыя энергетычныя кампаніі, энергаёмістыя галіны прамысловасці, фінансавы сектар і дзяржаўнае кіраванне. Праграма кангрэса была распрацавана Праграмным саветам, які складаецца з прадстаўнікоў урада, мясцовых органаў улады і кіруючых колаў ключавых стратэгічных кампаній.
Арганізатары зазначаюць, што энергетыка, прамысловасць, інфраструктура, і бяспека сёння маюць агульны назоўнік: капітал. «Кліматычны і энергетычны пераход генеруе найбуйнейшыя інвестыцыйныя патокі ў краіне, пераасэнсоўваючы мадэль развіцця польскай эканомікі на бліжэйшыя дзесяцігоддзі. Гэты рынак ахоплівае маштабныя інфраструктурныя праекты, атамную энергетыку і аднаўляльныя крыніцы энергіі, а таксама мадэрнізацыю прамысловасці, аўтаматызацыю працэсаў, выкарыстанне штучнага інтэлекту і развіццё мясцовых і рэгіянальных энергетычных ініцыятыў», — дадаюць яны.
Польскі кліматычны кангрэс — гэта платформа для дыялогу, дзе сустракаюцца найбуйнейшыя інвестары, асобы, якія прымаюць рашэнні, і лідэры рынку. Тут вызначаюцца новыя бізнес-магчымасці, будуюцца партнёрскія адносіны і прымаюцца рашэнні, якія ператвараюцца ў канкрэтныя інвестыцыйныя праекты — ад энергетыкі і прамысловасці, праз інфраструктуру, да лічбавізацыі і сістэмнай устойлівасці. Кангрэс таксама адыгрывае важную ролю ў распаўсюджванні ведаў.
ПР/юл