9-га кастрычніка некаторыя школы і дашкольныя ўстановы ў Мазавецкім ваяводстве адмяняюць заняткі. Так у гміне Вышкаў усе пачатковыя школы і дашкольныя ўстановы будуць зачыненыя, а таксама будзе арганізаваны догляд за дзецьмі. У Пясэчна заняткі ў школах і дашкольных установах праводзіцца не будуць. У Легіянове будуць зачыненыя пачатковыя школы № 3 і 7. Заняткі таксама адменены ў некаторых школах Пултускага, Валомінскага і Цеханаўскага паветаў.
Улады Валомінскага павета абвясцілі, што заняткі будуць адменены ў дзвюх муніцыпальных школах: сярэдняй школе № 1 і школьным комплексе № 3. Акадэмічная сярэдняя школа ў Плоцку таксама абвясціла аб адмене заняткаў і дыстанцыйнага навучання. Улады Гуры Кальварыі заклікаюць дзяцей заставацца дома. У астатніх школах заняткі будуць працягвацца, але будуць задзейнічаны дадатковыя патрулі паліцыі і муніцыпальнай аховы.
Гэтыя рашэнні прынятыя ў адказ на два сур'ёзныя інцыдэнты, якія адбыліся на гэтым тыдні ў Мазавецкім ваяводстве. У сераду 7-га кастрычніка 19-гадовы мужчына напаў з нажом на вучняў і настаўнікаў у Астраленцы. Зламыснік параніў пяцярых вучняў, двух настаўнікаў і двух мінакоў. 8-га кастрычніка ў горадзе Лешчыдол-Навіны каля Вышкава 15-гадовы падлетак уварваўся ў школу, забіў дворніка і параніў настаўніцу і дырэктара школы.
Сёння польская паліцыя заклікала грамадскасць захоўваць спакой, карыстацца толькі праверанай інфармацыяй і пазбягаць ілжывых паведамленняў. Зварот звязаны з непацверджанымі паведамленнямі пра заклік у інтэрнэце здзяйсняць напады на школы. У СМІ зʼявіліся заявы, якія сведчаць аб тым, што новыя атакі адбудуцца 9-га кастрычніка.
— З моманту зʼяўлення інфармацыі аб меркаваным анлайн-выкліку супрацоўнікі паліцыі пастаянна праводзяць мерапрыемствы па праверцы гэтых паведамленняў. Мы хацелі б паведаміць вам, што пакуль няма ніякіх прыкмет таго, што такая падзея сапраўды адбудзецца. Аднак супрацоўнікі паліцыі па ўсёй краіне, але ў першую чаргу з Цэнтральнага бюро па барацьбе з кіберзлачыннасцю, пастаянна працуюць над справай, рэагуючы на ўсе паведамленні і выяўляючы кожны трывожны сігнал у Інтэрнэце, — напісала паліцыя ў заяве ў сацыяльных сетках.
Паліцыя таксама нагадвае людзям, што наўмысныя спробы распальвання панікі караюцца законам.
ПР/юл