Еўракамісія пацвердзіла, што Польшчу могуць вызваліць ад прыёму мігрантаў з іншых краін ЕС і ўнясення фінансавых узносаў замест гэтага прыёму. Гаворка ідзе пра механізм салідарнасці ў межах Пакта ЕС аб міграцыі і прытулку. Канчатковае рашэнне яшчэ павінны ўхваліць дзяржавы Еўрасаюза.
— Польшча належыць да краін ЕС, якія сутыкаюцца з сур'ёзнай міграцыйнай сітуацыяй. Гэта звязана з тым, што Польшча прыняла вялікую колькасць людзей, якія прыбылі з Украіны, а акрамя таго, сутыкаецца з выклікамі, звязанымі з выкарыстаннем міграцыі як інструмента на мяжы. У гэтым сэнсе сітуацыя ў Польшчы з мінулага года ніяк не змянілася, — заявіў еўракамісар па пытаннях міграцыі Магнус Брунер.
Варшава спасылаецца на прыём украінскіх уцекачоў і выдаткі на ахову мяжы з Беларуссю, дзе рэжым Аляксандра Лукашэнкі выкарыстоўвае мігрантаў для гібрыднага ціску.
Вызваленне датычыцца наступнага года, а не ўсяго міграцыйнага пакта. Польшча павінна яшчэ падаць афіцыйны запыт на такое выключэнне.
iar/эж