Заяву ізраільскага прэм'ера аб тым, што на вайне здараюцца такія рэчы, ён назваў вельмі прыкраю.
Маршалак Сейма заявіў у эфіры TVP Info, што расстрэл мірных жыхароў - незалежна ад таго, кім яны з'яўляюцца і па якой прычыне знаходзяцца побач з баявымі дзеяннямі - з'яўляецца ваенным злачынствам. Ён дадаў, што гэта вельмі дакладна апісана міжнародным правам і пераследуецца.
Шымон Галоўня сказаў, што нельга мірыцца з тым, што на вайне гінуць мірныя жыхары. Ён падкрэсліў, што Польшча павінна патрабаваць не толькі тлумачэнняў і кампенсацыі для сям'і, але і прыцягнення да адказнасці вінаватых у здарэнні, калі яно кваліфікуецца праваахоўнымі органамі як ваеннае злачынства.
«Загінулыя не засталіся абыякавымі да лёсу мірных жыхароў Газы і паехалі аказваць гуманітарную дапамогу ва ўмовах генацыду і голаду», — падкрэсліў Махмуд Халіфа, амбасадар Палестыны ў Польшчы. Дыпламат таксама адзначыў, што валанцёры, якія належаць да амерыканскай арганізацыі, не перамяшчаюцца без поўнай каардынацыі з ізраільскай арміяй і робяць гэта ў браняваных аўтамабілях бяспечным спосабам, вядомым арміі. «Нягледзячы на гэта, канвой стаў прамой мішэнню», — адзначыў Махмуд Халіфа.
«Пазіцыя ЗША і неаднаразовыя вета ў Радзе Бяспекі ААН і міжнароднае маўчанне заахвочваюць Ізраіль здзяйсняць новыя злачынствы», — дадаў амбасадар. Ён падкрэсліў, што гэтая сітуацыя павінна быць спынена, і Ізраіль не можа працягваць ставіць сябе вышэй за закон.
У выніку ізраільскага авіяўдару па гуманітарным канвоі арганізацыі World Central Kitchen у сектары Газа загінулі сем чалавек: паляк, грамадзяне Аўстраліі, Вялікабрытаніі і асоба з падвойным грамадзянствам ЗША і Канады, а таксама палестынец. На канвой напалі, нягледзячы на тое, што ён быў пазначаны лагатыпам World Central Kitchen. Паводле медыкаў, удзельнікі калоны таксама былі апранутыя ў бронекамізэлькі з лагатыпам арганізацыі.
Пасля нападу арганізацыя неадкладна прыпыніла дзейнасць па аказанні дапамогі ў Сектары Газа. Такое ж рашэнне прыняла арганізацыя Anera, якая супрацоўнічае з World Central Kitchen. Абедзве групы пастаўлялі прыкладна два мільёны порцый ежы ў тыдзень у ахоплены вайной і голадам Сектар Газа.
IAR/вх