PKO Bank Polski захаваў прагноз сёлетняга эканамічнага росту ў Польшчы на ўзроўні 3,5 працэнта. Галоўны эканаміст банка Пётр Буяк (Piotr Bujak) лічыць, што наступны год можа быць лепшым, то бок рост ВУП можа наблізіцца да 4 працэнтаў:
- Гаворка ідзе пра тое, што да асноўнага рухавіка польскай эканомікі – спажывання, у будучым годзе далучацца таксама інвестыцыі. Прыток сродкаў з ЕС у рамках Нацыянальнага плана аднаўлення і сродкі з еўразвязаўскага бюджэту могуць прычыніцца да росту інвестыцыяў нават на 10 працэнтаў.
Паводле эксперта, наступствы сёлетняй паводкі агулам для польскай эканомікі будуць меншымі, чым у выпадку дзвюх папярэдніх буйных паводак:
- Трэба спадзявацца, што страты будуць меншыя, чым у выпадку дзвюх папярэдніх паводак – з 1997 і 2010 гадоў. Гэта, перш за ўсё, у выніку актуальнага памеру польскай эканомікі. Гэта не мяняе факту, што ў паасобных рэгіёнах Польшчы, дзе сёлетняя паводка нанесла велізарныя страты, будуць неабходныя буйныя сродкі на аднаўленне.
PKO BP таксама прагназуе, што інфляцыя вырасце прыкладна да 5% у верасні і захаваецца на гэтым узроўні ў чацвёртым квартале бягучага года.
IAR/аз