Мінімальную колькасць подпісаў за кандыдата ў прэзідэнты трэба павысіць да 300 000, лічыць прафесар Анна Северска(Anna Siewierska) з Жэшaўскага ўніверсітэта. Паводле палітолага, Выбарчы кодэкс патрабуе змяненняў, бо цяперашні парог у 100 000 подпісаў недастатковы, каб перашкодзіць балатавацца выпадковым асобам:
- У часы сацсетак і лёгкага доступу да збірання подпісаў падтрымкі – 100 тысяч подпісаў выглядае несур'ёзна і патрабуе павышэння. Трэба ўнесці змяненні ў Выбарчы кодэкс, каб неадпаведныя асобы не мелі шанцаў апынуцца сярод кандыдатаў у прэзідэнты, у сур'ёзнай краіне, у якой пражывае 37 мільёнаў чалавек.
Паводле прафесар Анны Северскай, неабходнасць такіх зменаў прадэманстравалі апошнія дэбаты кандыдатаў у прэзідэнты, арганізаваныя рэдакцыяй штодзёнкі Super Express, падчас якіх кандыдаты з вельмі нізкай падтрымкай прасоўвалі антысеміцкія і прарасійскія лозунгі, на што не рэагавалі вядучыя сустрэчу журналісты.
Паводле прафесар Анны Северскай, ад кандыдата ў прэзідэнты патрабуюцца самыя высокія стандарты, а гэтаму менавіта паспрыяе павышэнне выбарчага парога:
- У кандыдата ў прэзідэнты павінны быць не толькі адпаведныя кампетэнцыі але і палітычны бэкграўнд, які дапаможа яму рэалізаваць свае ідэі і прапановы. Таму калі нехта плануе стаць прэзідэнтам, то павінен будаваць такое асяроддзе вакол сябе і не на некалькі месяцаў да выбараў, але на некалькі гадоў раней. Мы патрабуем шмат чаго ведаць пра такога кандыдата: які ў яго досвед, ці можам яму давяраць, ці ён сумленны чалавек…
Хоць, як прызнала палітолаг, у выпадку павышэння мінімальнай колькасці подпісаў, беспартыйным кандыдатам сапраўды будзе цяжэй балатавацца на выбарах то, на яе думку, гэта перавага, бо найвышэйшая пасада ў краіне, патрабуе найвышэйшых кваліфікацый і стандартаў.
IAR/аз