«Нават адзін дзень у турме – гэта занадта шмат». Польскае МЗС вітае прысуджэнне прэміі Сахарава Анджэю Пачобуту

Польскія ўлады пастаянна змагаюцца за вызваленне, зняволеных у Беларусі палякаў, запэўніваюць прадстаўнікі ведамства.

МЗС Польшчы

Фота: msz.gov.pl

«Мы вельмі рады, што Анджэй Пачобут атрымаў прэмію Сахарава за сваю барацьбу за правы чалавека і свабоду. Нават адзін дзень у турме – гэта занадта шмат», – напісалі прадстаўнікі польскага Міністэрства замежных спраў на платформе X.

Cieszymy się, że Andrzej Poczobut otrzymał Nagrodę im. Sacharowa - za walkę o prawa człowieka i wolność.

Nawet jeden dzień więzienia to o jeden za dużo. pic.twitter.com/EWSCEFppJi

— Rzecznik MSZ (@RzecznikMSZ) October 22, 2025

Нагадваем, учора журналіст і актывіст польскай меншасці, які знаходзіцца ў турме ў Беларусі Анджэй Пачобут і асуджаная ў Грузіі журналістка Мзія Амаглабелі былі названы сёлетнімі лаўрэатамі прэміі Еўрапарламента «За свабоду думкі« імя Сахарава.

Гэтую ўзнагароду Пачобуту прынеслі дэмакратычныя каштоўнасці і непахіснасць, лічыць намеснік дзяржсакратара польскага МЗС Войцех Заёнчкоўскі (Wojciech Zajączkowski):

- Гэтая ўзнагарода таксама алегарычна сімвалізуе будучыню Анджэя Пачобута. Спадзяюся, што дзень яго вызвалення неўзабаве надыдзе і, як свабодны чалавек, ён зможа надалей прасоўваць каштоўнасці, якія яму дарагія.

Дыпламат таксама падкрэсліў, што польскія ўлады пастаянна змагаюцца за вызваленне польскіх палітычных зняволеных у Беларусі:

- Прыярытэт – гэта асобы, у якіх польскі пашпарт. Чым хутчэй яны будуць вызваленыя, тым хутчэй мы зможам пачаць дыялог паміж нашымі краінамі.

Прэмія «За свабоду думкі« імя Сахарава была заснаваная ў 1988 годзе. Гэта найвышэйшая ўзнагарода ЕС за дасягненні ў абароне правоў чалавека, дэмакратыі і свабоды слова.

IAR/аз