Пяці асобам прадʼяўленыя абвінавачванні па справе аб падпалах супермаркета OBI і гандлёвага цэнтра Марывільска (поль. Marywilska 44) ў Варшаве, а таксама крамы IKEA ў Вільні, паведамляе TVP Info.
Мазавецкае аддзяленне Дэпартамента па барацьбе з арганізаванай злачыннасцю і карупцыяй Нацыянальнай пракуратуры ў Варшаве завяршыла адзін з найважнейшых этапаў расследавання гучных падпалаў. Галоўнай мэтай расследавання было вызначыць вінаватых у пажары ў гандлёвым цэнтры Марывільска ў Варшаве.
Нагадаем, пажар успыхнуў ноччу 12 траўня 2024 года. За некалькі гадзін было знішчана амаль 1 500 гандлёвых кропак. Следчыя хутка высветлілі, што гэта быў наўмысны ўчынак. Паводле польскіх службаў, гэта быў тэрарыстычны акт, здзейснены сеткай агентаў, завербаваных і аплачаных расійскай службай ГРУ з мэтай запалохвання краінаў, якія падтрымліваюць Украіну.
Пяці асобам былі прадʼяўлены абвінавачванні. Трое з іх абвінавачваюцца ў актах дыверсіі, у тым ліку двое, як у Польшчы, так і ў краінах Балтыі.
Адным з абвінавачаных зʼяўляецца 19-гадовы ўкраінец Данііл Б. Яго абвінавачваюць у здзяйсненні актаў дыверсіі і тэрарыстычных злачынстваў.
12 траўня 2024 года мужчына запісаў пажар у цэнтры на вуліцы Марывільскай, а затым адправіў ролік Аляксандру Варыводзе – кіраўніку групы дыверсантаў, якая базуецца ў Расіі. Згаданы мужчына знаходзіцца ў міжнародным вышуку.
За дыверсію ў Польшчы абвінавачаным прадугледжваецца пакаранне ад 10 гадоў да пажыццёвага зняволення.
Аднак сітуацыя ўскладняецца тым, што Данііл Б. у цяперашні час адбывае пакаранне ў Літве. У лістападзе 2025 года мясцовы суд прыгаварыў яго да трох гадоў і чатырох месяцаў пазбаўлення волі за падпал крамы IKEA ў Вільні.
IAR/аз