Бліжэйшым часам з візітам у Польшчу прыбудуць амерыканскія перамоўшчыкі, каб абмеркаваць пытанне пастаяннай вайсковай прысутнасці ЗША ў Польшчы, паведаміў у эфіры RMF FM віцэ-міністр нацыянальнай абароны Польшчы Павел Залеўскі, які на мінулым тыдні сустракаўся з намеснікам міністра абароны ЗША Элбрыджам Колбі.
— Мы дамовіліся аб візіце групы амерыканскіх перамоўшчыкаў у Польшчу, — сказаў Залеўскі.
Ён дадаў, што гэта адбудзецца «вельмі хутка», бо з амерыканскага боку таксама ёсць гатоўнасць хутка завяршыць перамовы.
— Амерыканцы хочуць пастаянных базаў не ў рамках нейкага дабрачыннага жэсту ў адносінах да Польшчы, а таму, што яны лічаць, што маюць у Польшчы настолькі важныя інтарэсы, што хочуць знаходзіцца тут пастаянна, — падкрэсліў палітык.
Польшча даўно імкнецца павялічыць пастаянную прысутнасць амерыканскіх войскаў на сваёй тэрыторыі. У цяперашні час амерыканскія жаўнеры размешчаны ў Польшчы ў асноўным на ратацыйнай аснове. Пастаянная прысутнасць азначала б разгортванне пэўных амерыканскіх падраздзяленняў у Польшчы на працяглы перыяд разам з інфраструктурай і аб'ектамі для вайскоўцаў і іх семʼяў.
Павел Залеўскі размаўляў з Элбрыджам Колбі ў мінулы чацвер у Бруселі падчас візіту намесніка кіраўніка Пентагона ў Еўропу з мэтай абмеркаваць «НАТА 3.0». Гэта канцэпцыя адміністрацыі Дональда Трампа, згодна з якой Еўропа павінна ўзяць на сябе большую адказнасць за канвенцыйную абарону кантынента.
PAP/аз