Чарговы тэракт у Афганістане вельмі верагодны, заявіў прэзідэнт ЗША. У той жа час Джо Байдэн абвясціў аб працягу ўдараў у адказ на дзеянні гэтак званай «Ісламскай дзяржавы».
Учора ВПС ЗША правялі паветраную антытэрарыстычную аперацыю ў афганскай правінцыі Нангахар. Пентагон паведаміў, што загінулі два байцы «Ісламскай дзяржавы».
«Я сказаў, што мы нанясем удар па групе, адказнай за напады на нашых жаўнераў і невінаватых мірных жыхароў у Кабуле, і мы гэта зрабілі. Гэты ўдар быў не апошнім», – напісаў Джо Байдэн, які раней сустракаўся з дарадцамі па нацыянальнай бяспецы.
Прэзідэнт ЗША заявіў, што камандзіры паведамілі яму аб вялікай верагоднасці чарговага тэракту ў Афганістане на працягу наступных 24-36 гадзін.
Джо Байдэн дадаў, што да гэтага часу з Афганістана былі эвакуіраваны 117 000 чалавек і што аперацыя будзе працягвацца да канца ваеннай місіі ў Афганістане, то бок да 31 жніўня.
IAR/аз