Паводле выведкі, варта чакаць далейшых кібератак з боку Расіі і спробаў умяшання ў палітыку краін NATO.
Як адзначаецца ў штогадовай справаздачы, «расіянам аператыўны перапынак неабходны для аднаўлення сіл і падрыхтоўкі да доўгай вайны».
«Масква спрабуе выкарыстаць гэты перыяд адноснай стагнацыі, каб аднавіць дзейнасць расійскага ваенна-вытворчага комплексу, які, захоўваючы значныя вытворчыя магутнасці, пачынае адчуваць наступствы заходніх санкцый», – гаворыцца ў паведамленні.
Італьянская выведка нагадала, што мінулы год скончыўся прызнаннем Уладзімірам Пуціным цяжкасцяў на Данбасе ў барацьбе з украінскімі сіламі. У дакуменце адзначаецца, што гэты сігнал у спалучэнні з прапановай аднавіць расійскія ўзброеныя сілы і павялічыць іх да 1,5 мільёна вайскоўцаў «пацвярджае намер працягваць канфлікт да таго часу, пакуль не будуць дасягнутыя асноўныя мэты, якія пераследуе Масква».
У справаздачы гаворыцца, што прымяненне Расіяй у цяперашні час ядзернай зброі «малаверагоднае».
На думку італьянскіх службаў, Расія «не перастане ўмешвацца ў палітычную дынаміку і працэсы прыняцця рашэнняў у краінах NATO, яшчэ больш, чым у мінулым, звяртаючыся да метадаў прымусу і маніпуляцыі, такіх як кібератакі, дэзінфармацыя, шантаж і падыманне пытанняў міграцыі і энергетыкі». Пры гэтым адзначаецца, што апошняя тэма «страціць сваю значнасць дзякуючы імкненню Захаду знайсці альтэрнатывы энергетычнай залежнасці ад Расіі».
ав