Крэмль можа выкарыстаць гэтую зброю на ранняй стадыі канфлікту з іншай дзяржавай, гаворыцца ў расійскіх ваенных дакументах, апублікаваных у чацвер Financial Times.
Брытанскі штодзённік апісаў 29 сакрэтных расійскіх ваенных дакументаў, датаваных 2008-2014 гадамі, у тым ліку сцэнары ваенных дзеянняў у выпадку гіпатэтычнага кітайскага ўварвання, а таксама прэзентацыі для ваенна-марскіх афіцэраў, дзе абмяркоўваюцца аператыўныя прынцыпы выкарыстання ядзернай зброі.
Крытэрыі патэнцыйнага ядзернага адказу вар'іруюцца ад уварвання праціўніка на тэрыторыю Расіі да больш канкрэтных умоў, такіх як знішчэнне 20 працэнтаў расійскіх стратэгічных падводных лодак з балістычнымі ракетамі.
«Мы ўпершыню бачым такія дакументы ў адкрытым доступе. Яны паказваюць, што аператыўны парог прымянення ядзернай зброі даволі нізкі, калі жаданы вынік не можа быць дасягнуты звычайнымі сродкамі», – сказаў Аляксандр Габуеў, дырэктар Carnegie Russia Eurasia Center у Берліне ў інтэрвʼю «FT».
Расійская тактычная ядзерная зброя, якая можа быць дастаўлена наземнымі, марскімі або авіяцыйнымі ракетамі, прызначана для абмежаванага баявога выкарыстання ў Еўропе і Азіі – у адрозненне ад больш вялікай «стратэгічнай» зброі, прызначанай для нападу на ЗША. Аднак, як адзначае «FT», сучасныя тактычныя боегалоўкі ўсё ж могуць вылучаць значна больш энергіі, чым зброя, скінутая амерыканцамі на Нагасакі і Хірасіму ў 1945 годзе.
Financial Times піша, што хоць дакументы маюць больш за 10 гадоў, яны па-ранейшаму актуальныя для цяперашняй расійскай ваеннай дактрыны.
Абаронныя планы паказваюць глыбока ўкаранёныя падазрэнні ў дачыненні да Кітая сярод расійскіх ваенных элітаў, і яны захоўваюцца нават пасля таго, як Уладзімір Пуцін пачаў будаваць саюз з Пекінам, які ў 2001 годзе ўключаў пагадненне аб забароне выкарыстання ядзернай зброі ў якасці першага кроку ў канфлікце. З тых часоў Расія і Кітай паглыбілі сваё партнёрства, асабліва пасля таго, як Сі Цзіньпін прыйшоў да ўлады ў Пекіне ў 2012 годзе.
Аднак, нягледзячы на тое, што дзве краіны паглыблялі двухбаковае супрацоўніцтва, ва Усходняй ваеннай акрузе Расіі па-ранейшаму адпрацоўвалася шмат сцэнарыяў на выпадак кітайскага ўварвання, сведчаць дакументы. Падчас аднаго з вучэнняў, калі адбівалі гіпатэтычную атаку Кітая, быў зроблены вывад, што Расія, якую ў ваеннай гульні называюць «Паўночнай Федэрацыяй», можа адказаць тактычным ядзерным ударам, каб стрымаць «Поўдзень» ад другой хвалі наступу.
«Галоўнакамандуючы аддаў загад прымяніць ядзерную зброю (...) у выпадку, калі праціўнік разгорне часткі другой лініі і Поўдзень пагражае далейшым наступленнем у бок галоўнага ўдару», – гаворыцца ў дакуменце.
Асобная вучэбная прэзентацыя для ваенна-марскіх афіцэраў акрэслівае больш шырокія крытэрыі патэнцыйнага ядзернага ўдару, уключаючы высадку праціўніка на тэрыторыю Расіі, разгром падраздзяленняў, якія адказваюць за ахову памежных раёнаў або немінучую атаку праціўніка з выкарыстаннем звычайнай зброі.
Слайды абагульняюць парог прымянення ядзернай зброі як камбінацыю фактараў, пры якіх страты, панесеныя расійскімі войскамі, «незваротна прывядуць да іх няздольнасці стрымаць буйную варожую агрэсію», што зʼяўляецца «крытычнай (важнай) сітуацыяй для бяспекі расійскай дзяржавы».
З дакументаў вынікае, што расійскія вайскоўцы змогуць выкарыстоўваць тактычную ядзерную зброю для шырокага спектру мэтаў, у тым ліку для «стрымлівання дзяржаў ад агрэсіі... або эскалацыі ўзброеных канфліктаў», перадухілення пройгрышу бітваў або страты тэрыторыі Расіі, а таксама каб зрабіць ВМФ Расіі «больш эфектыўным».
PAP/вх