Паводле інфармацыі ўкраінскай арміі, расіяне атакавалі Кіеў дзвюма балістычнымі ракетамі. Верагодна, гэта былі мадэрнізаваныя ракеты «Онікс» або «Цыркон», запушчаныя з ваколіц акупаванага Крыма.
Пасля першых выбухаў была аб'яўлена трывога. На запісах, апублікаваных кіяўлянамі, бачна, як падчас выбуху дзеці бягуць да сховішчаў.
У выніку атакі не было трапленняў у шматпавярховыя жылыя дамы. Пакуль пра ахвяр невядома. Але як мінімум пяць чалавек пацярпелі, з іх двое – у бальніцы, паведаміў мэр Кіева Віталь Клічко.
Ратавальнікі працягваюць разбіраць завалы разбуранага трохпавярховага будынка, спартзалы дзяржаўнай навучальнай установы. У суседніх жылых дамах пашкоджаны вокны.
Апошнімі днямі расіяне ўзмацнілі авіяўдары па ўкраінскіх тэрыторыях. Толькі на мінулым тыдні яны выпусцілі па Украіне 190 ракет і 140 беспілотнікаў далёкага дзеяння «Шахед».
IAR/вх