«У Польшчы затрыманы два чалавекі, якія падазраюцца ў збіцці расійскага апазіцыянера Леаніда Волкава. Я дзякую Польшчы за выдатную працу, якую яна зрабіла, я гаварыў аб гэтым з прэзідэнтам Польшчы і падзякаваў ім за выдатнае супрацоўніцтва», — сказаў прэзідэнт Гітанас Наўседа, паведамляе LRT.
Кіраўнік Літвы падзякаваў спецыялістам літоўскай крымінальнай разведкі, якія правялі першапачатковую і падрыхтоўчую работу.
«У бліжэйшы час, пасля завяршэння працэсуальных дзеянняў, гэтыя асобы будуць перададзены Літве», — сказаў ён. Аднак не ўдакладніў, калі гэта можа адбыцца.
Наўседа не ўдакладніў, хто гэтыя людзі і грамадзянамі якой краіны з'яўляюцца.
«Я пакуль не ведаю ніякіх іншых падрабязнасцяў, але магу сказаць: я бачыў, як энергічна і настойліва працавала літоўская паліцыя на працягу апошняга месяца па гэтай справе, і вельмі рады, што гэтая праца мела вынік», — пракаментаваў Волкаў на сваёй старонцы ў Facebook.
На паплечніка Навальнага Леаніда Волкава напалі ў Вільні 12 сакавіка. Яму разбілі малатком акно ў машыне, распылілі ў вочы слёзацечны газ, Волкава таксама збілі малатком па нагах.
Да сакавіка 2023 года Волкаў узначальваў заснаваны Аляксеем Навальным Фонд барацьбы з карупцыяй (у Расіі ён прызнаны экстрэмісцкай арганізацыяй і забаронены). У Расіі супраць Волкава распачата крымінальная справа: улады абвінавачваюць яго ў «схіленні непаўналетніх да супрацьпраўных дзеянняў», гэта значыць да ўдзелу ў акцыях пратэсту. У пачатку 2021 года Літва адмовілася выдаць Волкава Расіі і назвала высунутыя супраць яго абвінавачванні палітычна матываванымі.
вх