Denik N напісаў, што, на думку экспертаў і чэшскага праваслаўнага духавенства, сітуацыя выклікае трывогу. Улады і спецслужбы занепакоеныя тым, што пракрамлёўская царква можа служыць інструментам для расійскіх спецслужбаў і органаў уплыву.
Выданне ўдакладняе, што артыкул прысвечаны сітуацыі ў Пражскай епархіі Праваслаўнай царквы Чэшскіх зямель, якая ўваходзіць у склад Праваслаўнай царквы Чэхіі і Славакіі. Сітуацыю ў Славакіі журналісты не асвятлялі.
Змены ў Чэшскай Праваслаўнай Царкве пачаліся ў 2014 годзе, калі да ўлады прыйшоў цяперашні арцыбіскуп Міхал Дандар, які, між іншым, быў калегаю расійскага патрыярха Кірыла ў Ленінградзкай духоўнай акадэміі ў Расіі. Патрыярх Кірыл, блізкі паплечнік прэзідэнта Уладзіміра Пуціна, знаходзіцца ў санкцыйным спісе Чэхіі.
Denik N таксама нагадвае, што шмат гадоў таму ў часы Чэхаславакіі Дандар быў агентам камуністычнай тайнай паліцыі StB.
Працэс пераменаў паскорыўся пасля ўварвання ва Украіну ў лютым 2022 года. Сярод сотняў тысяч уцекачоў было і праваслаўнае духавенства, якое належыць да лаяльнай Расіі Украінскай праваслаўнай царквы Маскоўскага патрыярхату. Гэтыя новапрыбыўшыя святары набываюць усё большы ўплыў у чэшскай царкве, піша штодзённік.
Выданне атрымала заяву Томаша Яроліма, прэс-сакратара арцыбіскупа Міхала (Дандара), які лічыць, што сувязі паміж Праваслаўнай Царквой і Масквой маюць гістарычны характар. Ён пагадзіўся з тым, што некаторыя вернікі і духавенства, якія ўцякаюць ад вайны, знаходзяцца пад уплывам Маскоўскага Патрыярхату, але адкінуў тэзіс, што ўся Чэшская Праваслаўная Царква схіляецца да Масквы. Паводле інфармацыі газеты, сітуацыя ў Праваслаўнай Царкве Чэшскіх земляў, якая ўваходзіць у Праваслаўную Царкву Чэхіі і Славакіі, інтэнсіўна расследуецца чэшскімі ўладамі і спецслужбамі. Яе значэнне ўзрастае па меры павелічэння колькасці вернікаў.
У 2021 годзе больш за 40 тысяч чалавек прызналі сваё членства ў Чэшскай Праваслаўнай Царкве. Паводле ацэнак, з пачаткам вайны ва Украіне і прытокам бежанцаў колькасць людзей, якія наведваюць праваслаўныя храмы, значна павялічылася.
PAP/вх