Прэм'ер Славакіі разглядае магчымасць будаўніцтва помніка савецкаму маршалу Івану Коневу. Роберт Фіца ўзняў гэтую тэму падчас сустрэчы з Уладзімірам Пуціным у Маскве, а расійскі лідар заявіў пра сваю падтрымку гэтай ініцыятывы.
Славакія можа стаць першай краінай у Цэнтральнай Еўропе, дзе пасля падзення камунізму будзе ўсталяваны помнік, звязаны з савецкай эпохай. Такім чынам Роберт Фіца хоча ўшанаваць камандзіра Усходне-Карпацкай аперацыі 1944 года — наступу Чырвонай Арміі, які меў на мэце падтрымаць антынацысцкае паўстанне ў Славакіі.
«Гэта высакародная справа, мы ўдзячныя і гатовыя дапамагчы, калі спатрэбіцца», — сказаў Уладзімір Пуцін, каментуючы ідэю будаўніцтва помніка падчас размовы з Робертам Фіца.
Прэм'ер Славакіі таксама заявіў у Маскве пра гатоўнасць супрацоўнічаць з расіянамі ў аднаўленні помнікаў і могілак салдат Чырвонай Арміі ў сваёй краіне.
Ініцыятыва прэм'ер можа знайсці падтрымку сярод часткі славацкага грамадства, якое ў параўнанні з іншымі краінамі рэгіёну мае больш станоўчыя настроі ў адносінах да Расіі і камуністычнага мінулага.
«Фіца ўжо даўно эксплуатуе гэтую настальгію», — адзначыў славацкі Denník N.
У 2020 годзе помнік Івану Коневу быў прыбраны ўладамі Прагі. Адным з аргументаў была яго роля ў падаўленні антыкамуністычнага паўстання ў Венгрыі ў 1956 годзе. Помнік знік з гарадской прасторы, нягледзячы на пратэсты расійскай амбасады і тагачаснага прэзідэнта Мілаша Земана. У сваю чаргу, два гады таму ў чэшскай сталіцы змянілі назву вуліцы, прысвечанай памяці савецкага маршала.
IAR/аз