Паводле звестак сайта, хоць скарачэнне колькасці амерыканскіх войскаў у Еўропе на 30 працэнтаў магчымае, нямецкія ўлады, дзе размешчана найбольшая колькасць войскаў, не ведаюць тэрмінаў і маштабаў любых патэнцыйных змен.
На працягу дзесяцігоддзяў амерыканская ваенная прысутнасць у Германіі была асновай глабальных аперацый ЗША і апорай еўрапейскай абароны, нагадвае Politico.
Cтаршы спецыяліст па палітыцы бяспекі ў Нямецкай радзе па міжнародных адносінах Эйлін Мэтле падкрэсліла ў інтэрв'ю сайту, што любыя скарачэнні павінны адбывацца «ўпарадкавана і скаардынавана, а не як нечаканасць для еўрапейскіх саюзнікаў».
Пасол ЗША ў НАТА Мэцью Уітакер заявіў журналістам на мінулым тыдні, што ён падтрымлівае штодзённы кантакт з саюзнікамі. «Мы дамовіліся, што ў стратэгічных рамках Еўропы не будзе ніякіх нечаканасцяў або прабелаў», — дадаў ён.
Улады ЗША плануюць правесці да верасня так званы глабальны агляд сіл, пераацаніўшы разгортванне амерыканскіх ваенных сіл па ўсім свеце. Яго мэта — прывесці амерыканскія сілы ў адпаведнасць са зменлівымі глабальнымі прыярытэтамі, асабліва з ростам напружанасці ў Інда-Ціхаакіянскім рэгіёне і ціскам з мэтай скарачэння выдаткаў ЗША за мяжой, адзначае Politico.
Германія размяшчае найбуйнейшы кантынгент амерыканскіх войскаў у Еўропе, і ваенная падтрымка ЗША з'яўляецца асновай бяспекі Германіі. У Германіі дыслакуюцца прыблізна 35 000 амерыканскіх вайскоўцаў з 90 000-100 000, размешчаных па ўсім Старым кантыненце.
Politico нагадвае, што ў чэрвені Германія абвясціла аб планах павялічыць выдаткі на абарону з прыкладна 86 мільярдаў еўра ў 2025 годзе да прыкладна 153 мільярдаў еўра ў 2029 годзе, што азначае павелічэнне прыкладна на 3,5 працэнта ВУП.
ав