Малдаўская кіраўніца папярэдзіла, што Расія рыхтуе беспрэцэдэнтнае ўмяшанне ў вераснёўскія парламенцкія выбары. Яна ацаніла, што найбольшую пагрозу ўяўляе карупцыя на выбарах і незаконнае фінансаванне з боку Расіі.
«Расійская Федэрацыя хоча кантраляваць Малдову, пачынаючы з восені, і рыхтуе беспрэцэдэнтнае ўмяшанне ў вераснёўскія выбары», — сказала Санду. Прэзідэнт выступіла пасля пасяджэння Савета бяспекі краіны, на якім абмяркоўвалася ўмяшанне ў выбары.
Санду папярэдзіла аб спробах знешніх суб'ектаў дэстабілізаваць сітуацыю ў краіне. Яна падкрэсліла, што грамадзяне павінны быць вельмі асцярожнымі і не паддавацца на патэнцыйныя прапановы пакупкі галасоў. Яна папярэдзіла, што грамадзянам, якія прадаюць свае галасы, пагражаюць фінансавыя штрафы і нават пазбаўленне волі.
Парламенцкія выбары ў Малдове прызначаны на 28 верасня.
PAP/юл