Кая Калас заявіла ў Капенгагене, што Расію трэба прымусіць спыніць напады на Украіну і пачаць перамовы аб спыненні вайны.
«Энергетычныя санкцыі і другасныя санкцыі будуць найбольш балючымі, але таксама і санкцыі на фінансавыя паслугі. Яны сапраўды перашкодзяць доступу расіян да капіталу, які ім так адчайна патрэбны. Дыскусіі па гэтым пытанні працягваюцца. Улічваючы кпіны Пуціна з мірных намаганняў, адзінае, што спрацуе — гэта ціск», — заявіла кіраўнік знешняй палітыкі ЕС.
Другасныя санкцыі, згаданыя кіраўніцай знешняй палітыкі ЕС, будуць накіраваны на краіны, якія гандлююць з Расіяй, падобныя да тых, што ЗША ўвялі супраць Індыі за куплю расійскай нафты. Еўрапейскі Саюз пакуль не выкарыстоўваў гэтага механізму санкцый.
Чакаецца, што Еўрапейская камісія неўзабаве распаўсюдзіць наступны, дзевятнаццаты, пакет санкцый супраць Расіі сярод дзяржаў-членаў ЕС. Апошні раз ЕС уводзіў санкцыі супраць Масквы ў сярэдзіне ліпеня.
IAR/яс