Прэзідэнт ЗША Дональд Трамп заявіў у нядзелю, што, нягледзячы на перастрэлку паміж Ізраілем і ХАМАС, спыненне агню застаецца ў сіле. Аднак Трамп прызнаў, што ХАМАС даволі «непаслухмяны».
Трамп пракаментаваў нядзельныя сутыкненні паміж ХАМАС і Ізраілем, якія пачаліся ў Рафаху на мяжы з Егіптам.
«Паглядзім, што будзе. Мы хочам запэўніць, што з ХАМАСам усё будзе ісці вельмі мірна. Як вы ведаеце, яны былі даволі непаслухмянымі. Яны трохі стралялі там, і мы думаем, што, магчыма, кіраўніцтва не ўдзельнічае, што, магчыма, гэта бунт», – сказаў Трамп. Аднак ён запэўніў, што «ўсё будзе зроблена належным чынам» і што спыненне агню выконваецца.
Трамп адмовіўся ацэньваць, ці была рэакцыя Ізраіля на напад ХАМАС апраўданай, дадаўшы, што гэта пытанне аналізуецца.
Ізраільскія вайскоўцы заявілі, што ў нядзелю раніцай каля горада Рафах на поўдні сектара Газа іх атакавалі «тэрарысты» і яны адкрылі агонь у адказ. Ізраільскія ўлады вінавацяць у атаках ХАМАС, які адмаўляе сваю датычнасць. Гэта самыя сур'ёзныя сутыкненні з моманту ўвядзення спынення агню больш за тыдзень таму.
Прадстаўнік ізраільскай арміі паведаміў прэсе, што сёння раніцай у раёне Рафаха адбыліся як мінімум тры інцыдэнты, падчас якіх баевікі ХАМАС адкрылі агонь па салдатах на ізраільскім баку лініі спынення агню. У выніку абстрэлу загінулі два ізраільскія салдаты, паведаміла армія.
Адразу пасля атак армія правяла авіяўдары і адкрыла артылерыйскі агонь, каб «ліквідаваць пагрозу». Падчас удараў было разбурана некалькі тунэляў і будынкаў, якія выкарыстоўваліся тэрарыстамі, адзначыла армія. У другой палове дня армія абвясціла аб чарговай хвалі авіяўдараў па мэтах ХАМАС на поўдні сектара Газа.
Раней палестынскія СМІ паведамлялі, што ваенна-паветраныя сілы таксама нанеслі ўдары па цэнтральнай і паўночнай частках Газы. Як мінімум сем чалавек загінулі і многія атрымалі раненні, паведамляе «Аль-Джазіра».
Паводле звестак Axios, ЗША аказалі ціск на Ізраіль, каб той адказаў «прапарцыйна, але стрымана».
ав