Як паведаміла тэлекампанія SIC, Агенцтва па інтэграцыі мігрантаў і прытулку (AIMA), якое знаходзіцца пад кіраўніцтвам Міністэрства ўнутраных спраў у Лісабоне, стварыла «спецыяльны канал сувязі» з ваеннымі ўцекачамі з Украіны і бежанцамі з Беларусі. Праз гэты канал яны могуць удакладніць сваё прававое становішча ў Партугаліі.
Дзякуючы гэтай форме сувязі ўцекачы могуць у электронным выглядзе падаваць у AIMA дакументы, якія пацвярджаюць, што яны не могуць вярнуцца на радзіму.
Справа таксама тычыцца актывістаў апазіцыі з Беларусі і Расіі, якіх чакаюць рэпрэсіі пасля вяртання ў свае краіны. AIMA «прааналізуе іх сітуацыю ў кожным канкрэтным выпадку» і разгледзіць небяспекі, якія пагражаюць грамадзянам Беларусі, Украіны і Расіі пасля вяртання на радзіму.
Паводле беларускіх актывістаў апазіцыі, AIMA яшчэ ў жніўні разаслала ім лісты з загадам пакінуць Партугалію. У лістах быў указаны 20-дзённы тэрмін для добраахвотнага выезду.
Пасля таго, як лісабонскае тэлебачанне асвятліла справу, улады AIMA растлумачылі, што яны прынялі меры для змены статусу людзей, якія прыбылі ў Партугалію з Украіны ў якасці ваенных бежанцаў. Паводле ацэнак, іх агульная колькасць перавышае 65 000, у тым ліку беларусаў.
IAR/яс