Віцэ-прэзідэнт Венесуэлы Дэлсі Радрыгес заявіла ў эфіры дзяржаўнага тэлебачання, што ў краіне функцыянуе нацыянальны ўрад, а Нікалас Мадура застаецца яго адзіным законным прэзідэнтам, паведаміла BBC.
«У Венесуэле ёсць толькі адзін прэзідэнт – і яго завуць Нікалас Мадура», – падкрэсліла Радрыгес.
Яна таксама выступіла з асуджэннем ваеннай агрэсіі ЗША супраць Венесуэлы і паведаміла аб невядомым месцазнаходжанні Мадура і першай лэдзі Сіліі Флорэс. У звароце яна заклікала да вызвалення прэзідэнта і яго жонкі.
«Мы патрабуем неадкладнага вызвалення прэзідэнта Нікаласа Мадура і яго жонкі Сіліі Флорэс», – заявіла Радрыгес.
Па словах віцэ-прэзідэнта, рада абароны краіны пачала дзейнічаць для забеспячэння абароны Венесуэлы. Радрыгес запэўніла грамадзян, што ўрад застаецца верным сваім абавязкам і гатовы абараняць краіну. Яна таксама заклікала насельніцтва да спакою і аб'яднання.
Гэтыя сцвярджэнні пярэчаць заявам прэзідэнта ЗША Дональда Трампа, які намякаў, што Радрыгес нібыта прыняла прысягу як прэзідэнт і выказала гатоўнасць супрацоўнічаць са Злучанымі Штатамі.
Нагадаем, у ноч на 3 студзеня ЗША нанеслі ўдары па сталіцы Венесуэлы Каракасу. У горадзе раздаваліся выбухі. Пазней Трамп заявіў, што ЗША паспяхова правялі маштабную аперацыю супраць Венесуэлы, а прэзідэнт Мадура разам са сваёй жонкай быў захоплены і вывезены з краіны.
вс