На дне Балтыйскага мора пашкоджаны чарговы падводны валаконна-аптычны кабель, які злучае Літву і Латвію. Інцыдэнт адбыўся ў пятніцу, 2 студзеня, паблізу латвійскай Ліепаі. Як паведаміла паліцыя Латвіі, следства пакуль не выявіла доказаў удзелу канкрэтнага судна ў пашкоджанні злучэння.
Судна, якое спачатку разглядалася як магчыма датычнае да здарэння, агледзелі ў порце, аднак ні экіпаж, ні сам карабель не былі затрыманыя. На мінулым тыдні таксама быў пашкоджаны кабель у Фінскім заліве.
Улады Латвіі падкрэсліваюць, што дакладная прычына пашкоджання пакуль невядомая, і заклікаюць устрымацца ад спекуляцый. Уладальнік кабеля — прыватная кампанія — пацвердзіў пашкоджанні, але адзначыў, што карыстальнікі ў Латвіі і Літве не адчуюць перабояў у сувязі.
Падобныя інцыдэнты на Балтыцы неаднаразова фіксаваліся з часу расійскага ўварвання ва Украіну, на што НАТА адказала ўзмацненнем сваёй прысутнасці ў рэгіёне.
Reuters/эж