Паводле кіраўнічкі знешняй палітыкі ЕС, Расія не ўсурʼёз ставіцца да перамоваў аб спыненні вайны ва Украіне, таму яна не чакае, што саміт прэзідэнтаў абедзвюх краін – Украіны і Расіі – адбудзецца ў бліжэйшы час.
Такім чынам Кая Калас пракаментаравала заявы спецыяльнага пасланніка ЗША Стыва Уіктафа аб магчымым саміце на вышэйшым узроўні, які, паводле яго, змог бы адбыцца на працягу некалькіх тыдняў.
«Аналізуючы сігналы, якія я атрымліваю, я не падзяляю гэтага аптымізму, таму што перамоўшчыкі з расійскага боку не ўспрымаюць перамоваў усурʼёз і не жадаюць абмяркоўваць палітычных пытанняў», – заявіла кіраўнічка знешняй палітыкі ЕС.
Яна таксама звярнула ўвагу на моцны ціск, які аказваецца на Украіну, каб яна саступіла і адмовілася ад сваіх «чырвоных ліній». «Але гэта не прынясе доўгатэрміновага міру», – канстатавала яна.
Кіраўнічка знешняй палітыкі ЕС таксама падкрэсліла, што на Расію трэба ціснуць, бо гэта яна зʼяўляецца агрэсарам у гэтай вайне. Кая Калас заявіла, што санкцыі павінны прымусіць Расію пайсці на саступкі.
Між тым, аказваецца, што ў ЕС няма згоды адносна ўвядзення 20-га пакета санкцый супраць Расіі за вайну супраць Украіны. Супраць выступаюць Венгрыя і Славакія.
IAR/аз