Сустрэча прадстаўнікоў ЗША і Ірану не адбудзецца ў пятніцу, як было запланавана, гаворыцца ў заяве Міністэрства замежных спраў Швейцарыі. Тэму асвятляе штодзёнка «Rzeczpospolita».
Першапачаткова ў Швейцарыі планавалася падпісаць папярэдняе пагадненне паміж ЗША і Іранам, якое павінна пакласці канец вайне на Блізкім Усходзе. Аднак яно было падпісана Дональдам Трампам падчас вячэры ў Вэрсалі 17 чэрвеня. З іранскага боку подпіс паставіў прэзідэнт Масуд Пезешкіян. Папярэдняе пагадненне ўключае амаль усё, чаго жадаў Іран, зазначае выданне.
Газета нагадвае, што яшчэ ўчора ўвечары была апублікавана заява прэс-службы Белага дому, у якой гаварылася, што віцэ-прэзідэнт ЗША Дж. Д. Вэнс адмяніў сваю паездку ў Швейцарыю для сустрэчы з іранскімі перамоўнікамі. Нягледзячы на пагадненне, падпісанае Трампам і Пезешкіянам, Вэнс павінен быў вылецець у Швейцарыю, каб неадкладна пачаць перамовы з Іранам аб канчатковай дамове аб спыненні вайны. Згодна з уступнай дамоўленасцю, бакі маюць 60 дзён, каб заключыць канчатковае пагадненне, якое, сярод іншага, вызначыць будучыню ядзернай праграмы Ірану.
Вэнс рыхтаваўся да свайго ад'езду, які быў запланаваны на чацвер вечарам. Яго памочнікі і журналісты нават сабраліся на авіябазе Эндрус, адкуль быў запланаваны вылет. У Швейцарыю таксама прыбылі прадстаўнікі адміністрацыі ЗША. Аднак у апошнюю хвіліну, у чацвер вечарам, рэйс быў адменены.
Амерыканскі бок заявіў, што не ведае, калі адбудуцца перамовы. Белы дом апублікаваў заяву, у якой гаворыцца, што Вэнс, прызначаны Трампам галоўным перамоўнікам на размовах з Іранам, быў гатовы пачаць перамовы, але амерыканскі бок не змог завяршыць падрыхтоўку, і таму віцэ-прэзідэнт застанецца ў Вашынгтоне.
— Лагістыка гэтых перамоваў ніколі не была простай або прадказальнай, — гаворыцца ў заяве.
Раней Вэнс на прэс-канферэнцыі ў Белым доме заявіў, што пакуль невядома, ці адбудуцца перамовы паміж ЗША і Іранам у гэтыя выхадныя.
— Мы плануем паехаць у Швейцарыю, я не ведаю дакладна калі, — сказаў віцэ-прэзідэнт ЗША. — Я думаю, што тэхнічныя размовы пачнуцца ў гэтыя выхадныя. Гэта пакуль што план. Але гэта можа змяніцца, — дадаў палітык.
юл