Міністр замежных спраў Украіны падзякаваў польскім службам за затрыманне мужчыны, які абразіў украінскую дзяўчынку. Інцыдэнт адбыўся на мінулым тыдні ў аўтобусе грамадскага транспарту ў горадзе Бельска-Бяла.
Паводле слоў Андрэя Сібігі, рашэнне аб затрыманні мужчыны было «хуткім і правільным». Адначасова ўкраінскі палітык нагадаў, што «такая агрэсія і нянавісць не павінны адбывацца ў еўрапейскім дэмакратычным грамадстве». Ён таксама заклікаў польскіх палітыкаў не распальваць нянавісць супраць Украіны і ўкраінцаў.
На відэа, размешчаным у інтэрнэце, мужчына пагражае дзіцяці, выкрыкваючы агрэсіўныя і ксенафобскія лозунгі. Ён таксама агрэсіўна паводзіў сябе ў дачыненні да пасажыраў, якія сталі ў абарону дзяўчынкі.
Пагрозы, запалохванне і падбухторванне да нянавісці непрымальныя, запэўніла прадстаўніца Міністэрства ўнутраных спраў і адміністрацыі Польшчы Караліна Галэцка (Karolina Gałecka).
— Вельмі часта ў сацсетках публікуюцца ролікі, якія дакументуюць падобныя інцыдэнты. З нашага боку — з боку польскага МУС, няма згоды на такія паводзіны, якія распальваюць канфлікт па нацыянальнай прыкмеце. Кожны заслугоўвае павагі незалежна ад нацыянальнасці, колеру скуры ці рэлігіі, — заявіла прадстаўніца польскага МУС.
Паліцыя арыштавала мужчыну, які аказаўся кіроўцам мясцовага прадпрыемства гарадскога транспарту. Кампанія абвясціла аб дысцыплінарных мерах супраць свайго супрацоўніка. Падчас інцыдэнту мужчына знаходзіўся на бальнічным.
IAR/аз