Абодва бакі спрабуюць знішчыць баявыя магчымасці праціўніка. Цэнтральнае камандаванне ЗША заявіла, што мэта амерыканскіх удараў — аслабіць здольнасць Ірану атакаваць камерцыйныя судны ў Армузскім праліве. Іранцы, якія імкнуцца кантраляваць праліў, у апошнія дні атакавалі судны, якія праходзілі праз яго, і ўрэшце закрылі праліў.
Іранскія атакі ў адказ сканцэнтраваны на амерыканскіх базах у рэгіёне — сёння раніцай Рэвалюцыйная варта паведаміла, што адной з мэтаў удараў быў ангар у Іярданіі, дзе ЗША захоўваюць свае знішчальнікі. Таксама праіранская ваенная арганізацыя з Іраку хоча далучыцца да Ірану.
— Новая вайна супраць Ірану выкліча наш неадкладны адказ, — заявіла «Катаіб Хезбала».
Нягледзячы на тое, што ні адзін з бакоў афіцыйна не абвясціў пра гэта, усё сведчыць аб тым, што мемарандум аб узаемаразуменні перастаў дзейнічаць, і ніякіх перамоваў не вядзецца. Па іроніі лёсу, на мінулым тыдні іранскі парламент выключыў праціўнікаў перамоваў са Злучанымі Штатамі са свайго ключавога камітэта па прыняцці рашэнняў — Камітэта па бяспецы і знешняй палітыцы.
У Дональда Трампа ў цяперашні час няма простага спосабу спыніць вайну з Іранам. Баявыя дзеянні аднавіліся, і папярэдні мемарандум фактычна перастаў дзейнічаць. Найбольшай перашкодай застаецца спрэчка аб Армузскім праліве.
Дональд Трамп мог бы паспрыяць чарговаму спыненню агню, але для канчатковага спынення вайны патрабуецца пагадненне з Іранам. Амерыканскія атакі аслабілі ваенны патэнцыял Тэгерану. Аднак яны не прымусілі Іран адмовіцца ад кантролю над Армузскім пралівам.
Сам праліў застаецца асноўным інструментам ціску Ірану. Вашынгтон не можа разблакаваць праліў аднымі авіяўдарамі, таму што рух суднаў залежыць ад ацэнкі рызык, якія вызначаюць суднаўладальнікі. Цяпер у прэзідэнта ЗША ёсць выбар паміж эскалацыяй і вяртаннем да перамоваў.
Дональд Трамп у інтэрвʼю тэлеканалу Fox News абвясціў, што на наступным тыдні ЗША нанясуць удары па іранскіх электрастанцыях і мастах у Іране. Аднак напады на цывільныя абʼекты супярэчаць міжнароднаму праву і могуць лічыцца ваенным злачынствам.
ПР/юл