Цэнтральнае камандаванне ЗША (CENTCOM) абвясціла аб пачатку «масіўнай хвалі ўдараў» па цэлях у Іране ў ноч са серады на чацвер. Вашынгтон ахарактарызаваў гэтыя ўдары як магутны адказ на ракетныя атакі на амерыканскія войскі ў рэгіёне, здзейсненыя папярэднім днём. Іранскія СМІ паведамілі пра выбухі на поўдні краіны.
— Сілы CENTCOM нанеслі ўдары па дзясятках абʼектаў Корпуса вартавых ісламскай рэвалюцыі (КВІР) у Іране, у тым ліку па камандных цэнтрах, ракетных і беспілотных абʼектах, а таксама па сістэмах назірання за ўзбярэжжам, — гаворыцца ў заяве камандавання.
Удары былі накіраваны на «далейшае зніжэнне пагроз для амерыканскіх войскаў, камерцыйнага суднаходства і суседніх краін Персідскага заліва».
Гэтым дзеянням папярэднічала заява прэзідэнта Дональда Трампа ў сераду:
— Мы будзем вельмі моцна біць па іх, таму што настала наша чарга. Яны ведаюць, што мы ідзём.
Іранскія СМІ паведамляюць пра шматлікія выбухі на поўдні краіны. На востраве Кешм у Армузскім праліве ракета трапіла ў жылы будынак, у выніку чаго тры чалавекі апынуліся пад заваламі, а яшчэ дваіх даставілі ў шпіталь. На востраве таксама пачаліся адключэнні электраэнергіі. Паведамлялася таксама пра ўдары па востраве Кеш, порце Абадан у Хузестане — сэрцы нафтавай прамысловасці Ірана, у правінцыі Бушэр, дзе размешчана атамная электрастанцыя, і ў горадзе Казерун у правінцыі Фарс.
У адказ Корпус вартавых ісламскай рэвалюцыі абвясціў аб працягу барацьбы, сцвярджаючы, што правёў уласныя аперацыі супраць амерыканскіх цэляў, паведамляе «Аль-Джазіра».
Нягледзячы на рэзкую эскалацыю, нафтавыя рынкі адрэагавалі спакойна, паведамляе Reuters. Пасля першапачатковага росту цана барэля Brent упала на 1,42% да 89,45 долара, паколькі транзіт танкераў з Персідскага заліва пакуль не спынены.
Цяперашняя эскалацыя на Блізкім Усходзе зʼяўляецца працягам узброенага канфлікту, які пачаўся 28 лютага з нападу Ізраілю і ЗША на Іран.
PAP/юл